बीस वर्षपछि नेपाललाई एशियाडमा रजत पदक

इण्डोनेसियाको जाकर्तामा जारी १८ औं संस्करणको एशियाली खेलकूद अन्तर्गत भएको प्याराग्लाइडिङको पुरुष क्रस कन्ट्री प्रतियोगितामा रजत पदक विजेता नेपालका खेलाडीहरु । एशियाडमा पहिलो पटक सहभागिता जनाएको प्याराग्लाइडिङ खेलमा नेपाललाई रजत पदक प्राप्त भएको हो । तस्वीर – रोशन सापकोटा, जाकर्ता, रासस

काठमाडौँ, १३ भदौ – एसियाडको ६७ वर्षे इतिहासमा नेपालले दोस्रो पटक रजत पदक जित्न सफल भएको छ । इण्डोनेसियामा जारी १८औं संस्करणको एशियाडअन्तर्गत प्याराग्लाइडिङको पुरुष क्रस कन्ट्री स्पर्धाको अन्तिम चरणको खेलमा नेपालले आज रजत हात पारेको हो ।

पहिलो पटक एशियाली खेलकूद (एशियाड)मा सहभागिता जनाएको प्याराग्लाइडिङ खेलले आज नेपाललाई रजत पदक दिलाएसँगै एशियाडमा नेपालको यो दोस्रो उच्च उपाधी हो । यसअघि सन् १९९८ मा थाइल्याण्डको बैंककमा भएको १३औँ एशियाडमा तेक्वान्दोकी सविता राजभण्डारीले नेपाललाई रजत पदक दिलाएकी थिइन् ।

थाइल्याण्डको बैंककमा १९९८ मा तेक्वान्दो खेलाडी राजभण्डारीले जितेको रजतपछि अर्को रजत पदक जित्न नेपाललाई २० वर्ष कुर्नुपरयो । नेपालले कूल १६ संस्करण खेल्दासम्म एशियाडमा स्वर्ण पदक भने जित्न सकेको छैन ।

विमल अधिकारीले नेतृत्व गरेको नेपाली प्याराग्लाइडिङ टोलीमा युकेश गुरुङ, विजय गौतम, सुशील गुरुङ र विशाल थापा छन् । क्रस कन्ट्री इभेन्ट इण्डोनेसियाको वेस्ट जाभास्थित गुनुङ मास पुनासमा पाँच दिनसम्म चलेको थियो ।

नेपाल स्वर्ण पदक जित्नबाट जापानसँग २७ अङ्कले पछि पर्दै रजत पदक जितेको हो । नेपालले कूल ११ हजार ३६४ अङ्क ल्याउन सफल भयो भने पहिलो भएको जापानले ११ हजार ३९१ अङ्क प्राप्त गरेको हो ।

जारी प्रतियोगितामा नेपाल पदक जित्ने ३७औँ मुलुकसमेत भएको छ । यसअघि जारी प्रतियोगितामा ३६ मुलुकले पदक जितिसकेका छन् । एशियाडको १८औँ संस्करणसम्म आइपुग्दा नेपालले कूल दुई रजत र २२ कांस्य पदक जितेको छ ।

“पदक जितेकामा धेरै खुशी लागेको छ”, नेपाल प्याराग्लाइडिङ सङ्घका महासचिव शैलेन्द्र राउतले भन्नुभयो, “पहिलो प्रयासमै हामी पदक जित्न सफल भयौँ ।”

नेपाली टोलीका प्रशिक्षक तथा व्यवस्थापक योगेश भट्टराईले भन्नुभयो, “१८औँ एशियाडमा नेपालको पदकको खडेरी तोड्न सफल भएका छौँ । यो नेपालीका लागि गौरवको कुरा हो ।” एशियाली खेलकूदमा पदक जित्ने प्याराग्लाइङडिङ नयाँ खेलसमेत भएको हो । योसँग नेपालले एशियाली खेलकूदमा दुई रजतसहित २४औँ पदक जितेको छ ।

पदकको आशा गरिएको तेक्वान्दो, कराते, बक्सिङजस्ता खेलमा कमजोर बनेको नेपालका लागि प्याराग्लाइडिङले एशियाली खेलकूद इतिहासमै नेपालको दोस्रो रजत पदक जित्दै निराश हुनबाट जोगाएको छ ।

प्रधानमन्त्रीद्वारा प्याराग्लाइडिङ खेलाडीलाई बधाई

प्रधानमन्त्री केपी शर्मा ओलीले एशियाली खेलकूद (एशियाड) मा रजत पदक जित्न सफल नेपाली प्याराग्लाइडिङ खेलाडीलाई बधाई ज्ञापन गर्नुभएको छ ।

प्रधानमन्त्री ओलीले आज साँझ ट्वीटमार्फत पदक विजेता टोलीलाई बधाई दिनुभएको हो ।

प्रतिक्रिया

सम्बन्धित सामाग्री