शुक्रबार, मंसिर १९ २०७७ | Fri, December 04, 2020
नेपालको समय: २३:५४ | UK Time: 18:09

एनआरएनएको छैटौँ मध्यपूर्व क्षेत्रीय बैठक दुबईमा, श्रमिक समस्या मुख्य एजेण्डा

रासस
२०७५ भदौ ५ गते १८:५९

काठमाडौँ, ५ भदौ – मध्यपूर्वका देशमा कार्यरत नेपालीले भोग्नुपरेका समस्या पहिचान गरी सम्बोधन गर्ने उद्देश्यले गैरआवासीय नेपाली सङ्घ (एनआरएनए) को छैटौँ मध्यपूर्व क्षेत्रीय बैठक संयुक्त अरब इमिरेट्स(युएई) को दुबईमा शुरु हुँदैछ ।

यही भदौ ७ गतेदेखि शुरु हुने सो बैठकमा घरेलु कामदारका समस्या, अंगभंग र मृत्यु भएकाको परिवारलाई सरकारले दिनुपर्ने सुविधा, वैदेशिक रोजगारीमा हुने ठगी नियन्त्रण र निःशुल्क टिकट तथा प्रवेशाज्ञाको कार्यान्वयनका बारेमा छलफल हुने एनआरएनएका प्रवक्ता भूषण घिमिरेद्वारा आज जारी विज्ञप्तिमा उल्लेख छ ।

वैदेशिक रोजगारीमा जाने युवाका लागि भाषा, सीपमूलक तालीम, फर्केर आएका युवायुवतीका लागि उद्यममा लाग्न प्रोत्साहन तथा समाजमा पुनःस्थापना र समायोजन, सामाजिक सुरक्षा कोष, हजारे अभियानलगायत विषयमा समेत बैठकमा छलफल हुने विज्ञप्तिमा जनाएको छ ।

बैठकले मध्यपूर्वमा कार्यरत नेपाली माझ स्थानीय भाषा र कानूनमा ज्ञानको कमी तथा सूचना अभावलगायत विविध कारणले जेलजीवन बिताउनु परेको र काम गर्ने क्रममा गम्भीर दुर्घटनामा परी अंगभंग भएका श्रमिकका समस्या निराकरणका लागि सुझाव दिनेछ ।

विदेशबाट पठाएको रेमिट्यान्सलाई उत्पादनशील क्षेत्रमा लगानी गर्ने वातावरण बनाउन, वैदेशिक रोजगारीमा जाने नेपालीको जनचेतना वृद्धि र विदेशमा सिकेका ज्ञान तथा सीपलाई मातृभूमिमा कसरी उपयोग गर्न सकिन्छ भन्ने विषयमा पनि बैठकमा छलफल हुने प्रवक्ता घिमिरेले जानकारी दिनुभयो ।

विदेशस्थित नेपाली नियोगमार्फत विदेशमा श्रम स्वीकृति एवं अनुगमनको व्यवस्था, श्रम स्वीकृति कार्यान्वयन, श्रम सीप बैंकको स्थापना, कामदार र सरकारी निकायबीच समन्वय, वैदेशिक रोजगारीमा गएकाको लागि सञ्चयकोषको व्यवस्था गर्न बैठकले नेपाल सरकारको ध्यानाकर्षण गराउनेछ ।

बैठक यही भदौ ९ गतेसम्म चल्नेछ ।

एनआएनएले आफ्नो स्थापनाकालदेखि नै वैदेशिक रोजगारीलाई सुरक्षित, मर्यादित र सम्मानित बनाउन समयसापेक्ष सुधारका लागि सरकार तथा अन्य सरोकारवाला निकायको ध्यानाकर्षण गराउँदै आएको छ ।

यस क्षेत्रमा करीब २० लाखभन्दा बढी नेपाली श्रमिक कार्यरत रहेको एनआरएनएले जनाएको छ । नेपाल भित्रने कुल विप्रेषण (रेमिट्यान्स) को ६० प्रतिशत मध्यपूर्वबाट नै आउने विभिन्न अध्ययनले देखाएका छन् ।

बैठकमा नेपालबाट खानेपानी मन्त्री बीना मगर, पूर्वश्रममन्त्री रमेश लेखक, श्रम मन्त्रालयका उच्च अधिकारीलगायत एनआएनएका प्रतिनिधिको सहभागिता रहने जनाएको छ ।

प्रतिक्रिया

सम्बन्धित सामाग्री

फेसबुक