बिहीबार, मंसिर १८ २०७७ | Thu, December 03, 2020
नेपालको समय: १७:४१ | UK Time: 11:56

एकदिवसीय अन्तर्राष्ट्रियमा नेपालको ऐतिहासिक पहिलो जित, नेदरल्याण्ड्स १ रनले पराजित

वीनेपाली
२०७५ साउन १८ गते १८:२३

तस्वीर-अाइसीसी

काठमाडौं–एकदिवसीय अन्तर्राष्ट्रियमा डेब्यु प्रतियोगिताको दोस्रो खेलमा नेपाल विजयी भएको छ । शुक्रबार नेदरल्याण्ड्समा भएको पहिलो एकदिवसीय सिरिजको दोस्रो खेलमा नेपालले नेदरल्याण्डसमाथि १ रनको रोमाञ्चक जित निकालेको हो ।

एकदिवसीय राष्ट्रको मान्यता पाएको साढे चार महिनामा नेपालले हात पारेको यो जित एकदिवसीय अन्तर्राष्ट्रियमा नेपालको पहिलो जित समेत हो । जितसँगै नेपाल र नेदरल्याण्ड्सबीचको दुई खेलको एकदिवसीय सिरिज बराबरी भएको छ । यसअघि पहिलो खेलमा नेदरल्याण्डसले नेपालमाथि ५५ रनको जित निकालेको थियो ।

शुक्रबारको रोमान्चक खेलमा नेपालले अन्तिम बलमा जित हासिल गरेको थियो । टस जितेर ब्याटिङ गरेको नेपालले निर्धारित ४८.५ ओभरमा अलआउट हुँदै २ सय १६ रन जोडेको थियो । जवाफी ब्याटिङमा उत्रिएको नेदरल्याण्डसले निर्धारित ५० ओभरमा ९ विकेट क्षतिमा १ सय १५ रनमात्र जोड्न सक्यो ।

अन्तिम ओभरमा नेदरल्याण्डसलाई जितका लागि ६ रनको आवश्यकता थियो । नेपालका कप्तान पारस खड्काको सुरुवाती ५ बलमा नेदरल्याण्डसले ४ रन जोड्यो । अन्तिम बलमा जितका लागि २ रन चाहिएको अवस्थामा पारसले बराबरी समेत गर्न नदिइ नेदरल्याण्डसका क्लासनलाई रन आउट गरेपछि नेपालले रोमान्चक जित निकालेको हो ।

नेदरल्याण्डसका लागि बेस्ले बारेसीले सबैभन्दा बढी ७१ रन जोडे । दिपेन्द्रसिंह ऐरीको एल्बीडब्ल्युको शिकार हुनुअघि उनले ८ चौका प्रहार गरेका थिए । यस्तै, डेर ब्राकले ३९, कप्तान पिचर सिलारले २१ र बेन कपुरले १९ रन जोडे । अन्य कुनै पनि ब्याटसम्यानले राम्रो प्रदर्शन गर्न सकेनन् ।

बलिङतर्फ नेपालका सन्दीप लामिछानेले ३ विकेट लिए भने ललित भण्डारीको नाममा २ विकेट रह्यो । यस्तै सोमपाल कामी, पारस खड्का, बसन्त रेग्मी र दिपेन्द्र सिंह ऐरीले १/१ विकेट लिए ।

नेपालको ब्याटिङमा सोमपाल कामीले सर्वाधिक ७१ रन जोडे । उनले ५ चौका र ३ छक्का प्रहार गरेका थिए । यस्तै, पारसले ६ चौका र २ छक्काको मद्दतले ५१ रन जोडे । दीपेन्द्र सिंह ऐरी १९ रनमा रनआउट भए । सुवास खकुरेलले १९ र आरिफ शेखले १६ रन जोडे, अन्य कुनै पनि ब्याटसम्यानले राम्रो प्रदर्शन गर्न सकेनन् ।

नेदरल्याण्डसका फ्रेडरिक ज्याक कालिसनले ३ विकेट लिए भने एमजेजी रिप्पोन र पिए सेल्लरले २-२ विकेट लिए । नेपालका सोमपाल कामी ‘म्यान अफ द म्याच’ घोषित भए ।

प्रतिक्रिया

सम्बन्धित सामाग्री

फेसबुक