राष्ट्रपति डोनाल्ड ट्रम्प, तस्विर- एपी
वासिङ्टन, ६ असार – संयुक्त राज्य अमेरिकाले संयुक्त राष्ट्रसंघको मानवअधिकार परिषदबाट मङ्गलबार अलग हुने घोषणा गरेको छ ।
अमेरिकाले उक्त परिषदलाई राजनीतिक पूर्वाग्रह गरेको आरोप र आलोचना गर्दै अमेरिका सो परिपदबाट छुट्टिएको घोषणा गरेको छ ।
राष्ट्रसंघका लागि अमेरिकी राजदूत निक्की हेलीले वासिङ्टनमा यो घोषणा गर्नुभएको छ ।
उहाँले अमेरिकी राष्ट्रपति डोनाल्ड ट्रम्प र विदेशमन्त्री माइक पोम्पेओको राय बमोजिम नै यो निर्णय गरिएको पनि बताउनुभएको वासिङ्टनबाट प्राप्त समाचारमा जनाइएको छ ।
केही विदेशी स्वार्थी राष्ट्र वा व्यक्तिले आफनै सेवागर्ने निकायको रुपमा यसलाई प्रयोग गर्दै आएकाले पनि उक्त परिषदबाट अमेरिकाले निस्किने निर्णयमा पुगेको राष्ट्र संघकालागि अमेरिकी राजदूत निक्की हेलीले बताउनुभयो ।
यस परिषदका सदस्यले आफ्ना र आफूले गरेका मानवअधिकार उल्लङ्घनका घटना लुकाउन यो परिषद खोलेको समेत आरोप लगाउनु भएको छ ।
राष्ट्रसंघको मानवअधिकार परिषद् गतवर्ष इजरायलप्रति सधैँ पूर्वाग्रही भएको आरोप लगाउँदै अमेरिकाले सो परिषद्को सदस्यता नवीकरणको लागि आगामी दिनमा विचार गर्ने पनि बताएको छ ।
जेनेभामा सन् २००६ मा गठन भएको संयुक्त राष्ट्रसंघीय मानवअधिकार परिषद्ले मानवअधिकारको अवस्थाबारे प्रश्न उठाउन मिल्ने मुलुकहरूलाई पनि आफ्नो सदस्य बन्न दिएको आरोप अमेरिकाले विगतदेखि नै लगाउँदै आएको थियो ।
राजदूत हेलीले वासिङ्टनमा आयोजित पत्रकार सम्मेलनमा मानवअधिकार परिषदबाट अलग हुने अमेरिकी निर्णयबारे जानकारी दिनुभएको थियो ।
सो पत्रकार सम्मेलनमा विदेशमन्त्री पोम्पेओ पनि सहभागी हुनुहुन्थ्यो । परिषद्लाई मानवअधिकारको रक्षागर्न नसक्ने र निकै कमजोर निकायको संज्ञासमेत उहाँले दिनुभएको थियो ।
यसैबीच संयुक्त राष्ट्रसंघका महासचिव एन्टोनियो गुथ्रेसले आफ्ना प्रवक्तामार्फत जारी गर्नुभएको एक प्रेस वक्तव्यमा अमेरिका मानवअधिकार परिषदबाट बाहिर निस्किन नहुने बताउनुभएको छ ।
उहाँले यस्तो सम्वेदनशिल परिषद्बाट अमेरिका बाहिर नजाओस भन्ने आफ्नो चाहना रहेको पनि बताउनुभएको समाचारमा जनाइएको छ ।
उता इजरायलले भने अमेरिकाको उक्त निर्णयको स्वागत गरेको बताइएको छ । इजरायलको विदेश मन्त्रालयले विज्ञप्ति प्रकाशन गरी अमेरिकाले उक्त परिषद्बाट अलग हुनेगरी गरेको निर्णयको स्वागत गरेको छ ।
अमेरिकाको निर्णयबाट अष्ट्रेलिया निरास
सिड्नी, ६ असार (रासस/सिन्ह्वा) – संयुक्त राष्ट्रसंघको मानव अधिकार परिषदबाट अगल हुने संयुक्त राज्य अमेरिकाको घोषणाबाट अष्ट्रेलिया निरास भएको छ ।
अमेरिकाको यो निर्णयबाट संयुक्त राष्ट्रसंघको मानव अधिकार परिषद् (यूएनएचआरसी) पछाडि गएको अष्ट्रेलियाका विदेश मन्त्री जुली विसपले बुधबार बताउनुभएको छ ।
अमेरिकाको यूएनएचआरसीबाट छुट्टिने निर्णयबाट अष्ट्रेलिया निरास भएको विदेशमन्त्री जुलीको कार्यालयबाट प्रकाशित विज्ञप्तिमा जनाइएको छ ।
संयुक्त राष्ट्र संघका लागि अमेरिकी राजदूत निक्की हेलीले यस परिषद्माथि राजनीतिक पूर्वाग्रहरूपी फोहोर थुपार्ने खाल्डो, कपटी, पाखण्डी र इजरायलको विरोधीजस्ता अनेक आरोप लगाउँदै अमेरिका यस परिषदबाट छुट्टिएको घोषणा गर्नुभएको थियो ।
राजदूत हेलीले विदेशमन्त्री माइक पोम्पेओसँग वासिङ्टनमा भएको संयुक्त पत्रकार सम्मेलनमा मानव अधिकार परिषदबाट अलग हुने अमेरिकी निर्णय सार्वजनिक गर्नुभएको हो ।
