डायमन्ड बुद्धिस्ट सेन्टर यूकेको साङपूजा तथा प्रवचन

लन्डन । डायमन्ड बुद्धिस्ट सेन्टर यूकेले साङपूजा तथा प्रवचन कार्यक्रम गरेको छ । गत १० जुन आइतबार लन्डन प्लमस्टिड कमनस्थित वर्किङ म्यान्स क्लबहलमा कार्यक्रम भएको हो ।

तमु बौद्ध एसोसिएसन नेपालका अध्यक्ष तथा पोखरास्थित तमु बौद्ध अर्घौं सदनका प्रमुख गुरु खिम्पो शिरलम गुरुङ (थुप्तेन येशे) ले पूजा, प्रवचन दिए । साङपूजापछि गुरुको सारगर्भित तथा गहन प्रवचनले सहभागी सबै मन्त्रमुग्ध देखिन्थे । पूजा प्रारम्भ हुनु अघि धर्मगुरु खिम्पो शिरलमलाई विधिपूर्वक भव्य स्वागत गरिएको थियो ।

संस्थाका अध्यक्ष सुमलकुमार गुरुङले केहि महिनादेखि दक्षिणपूर्व लण्डन क्षेत्रमा एउटा बौद्ध गुम्बा निर्माण गर्ने उद्देश्यले धार्मिक तथा च्यारिटी कार्यक्रम गरेर आर्थिक संकलन गर्दै आइएको बताए ।

अध्यक्ष गुरुङले लन्डनको दक्षिणपूर्व क्षेत्रमा नेपाली मुलका 
बौद्धधर्म अनुयायीहरूको संख्या हजारौं पुगेपनि हालसम्म नेपालीको गुम्बा स्थापना नभएको बताए । धार्मिक कार्यक्रम आयोजना गरेर बौद्ध दर्शनको अभ्यास र यसलाई व्यापकता दिने कार्यमा डायमन्ड बुद्धिस्ट सेन्टर यूके क्रियाशिल रहेको समेत अध्यक्षले उल्लेख गरे ।

कार्यक्रम संस्थाका महासचिव योगेश गुरुङले सञ्चालन गरेका थिए । हलमा सहभागी सबै श्रद्धालुलाई सम्बोधन गर्दै संस्थाकी उपाध्यक्ष मिना गुरुङले स्वागत मन्तव्य दिएकी थिइन् ।

कार्यक्रममा तमु बौद्ध धर्मगुरु मध्ये सबैभन्दा पहिले बौद्धधर्ममा विद्यावारिधि (खिम्पो उपाधि) प्राप्त गरेका धर्मगुरु खिम्पो शिरलमलाई उनले बौद्ध धर्म प्रवर्धनका लागि पुरयाएको अथक योगदान र बुद्ध दर्शन व्यापक रुपमा फैलाएको भन्दै डायमन्ड बुद्धिस्ट सेन्टर यूकेले कदरपत्रद्वारा सम्मान गरयो ।

संस्थाका अध्यक्ष गुरुङले सहभागी सबैलाई आभार तथा धन्यवाद ज्ञापन गर्दै कदरपत्र पढेर सुनाएका थिए । यसै अवसरमा संस्थाको पूजा र प्रवचन कार्यक्रममा आर्थिक सहयोग र विभिन्न कोणबाट सहयोग गर्दै आएका संस्था र व्यक्तित्वहरुलाई धर्मगुरुको बाहुलीबाट कदरपत्र वितरण गरि सम्मान गरिएको थियो ।