किमभन्दा पहिले ट्रम्प र आबेबीच भेटवार्ता हुने

टोकियो, १४ जेठ – उत्तर कोरियासँगको शिखर वार्ता अगाडि नै जापानका प्रधानमन्त्री सिन्जो आबेले अमेरिकाका राष्ट्रपति डोनाल्ड ट्रम्पलाई भेट्ने हुनुभएको छ । आवेले शिखरवार्ता भन्दा अगाडि नै आफूहरुका बीचमा भेटवार्ता हुने सहमति भएको सोमबार जानकारी दिनुभएको जापानी समाचार संस्था क्योदोले जनाएको छ ।

ट्रम्प र उत्तर कोरियाका नेता किम जोङ उनबीच शिखर वार्ता आगामी जुन १२ मा सिङ्गापुरमा हुने भनिएको छ ।

यसअघि भङ्ग होलाजस्तो भएको शिखर वार्ता निर्धारित समयमै हुने भएपछि दुबैतर्फका अधिकारीहरुले त्यसको आन्तरिक तयारी सुरु गरेका छन् । यसअघि अमेरिकी राष्ट्रपति डोनाल्ड ट्रम्पले पूर्व निर्धारित समयको वार्ता नहुने भनी घोषणा गरेपछि त्यसप्रति आफू निकै दुःखी भएको बताएको उत्तर कोरियाले पनि अहिले वार्ताको आवश्यक तयारी शुरु भएको जनाएको छ ।

वार्ताको तयारीकै लागि अमेरिकाको एक प्रतिनिधिमण्डल आज उत्तर कोरिया पुगेको अमेरिकी अधिकारीहरुले जनाएका छन् ।