बिहीबार, मंसिर १८ २०७७ | Thu, December 03, 2020
नेपालको समय: १९:२८ | UK Time: 13:43

लन्डनमा नेपालको शिक्षा क्षेत्रका अवसरबारे अन्तरक्रिया

वीनेपाली
२०७५ जेठ ९ गते ८:२६

लन्डन । नेपालको शिक्षा क्षेत्रमा रहेका अवसरका विषयमा लन्डनमा चर्चा परिचर्चा गरिएको छ । नेपालका लागि बेलायती राजदूत रिचर्ड मोरिसले ब्रिटेन नेपाल चेम्बर अफ कमर्ससंगको सहकार्यमा सोमबार गरेको सेमिनारमा यस विषयमा चर्चा भएको हो ।

सेमिनारमा नेपालको शिक्षा क्षेत्रमा सेवा बिस्तार गरिसकेका तथा भविष्यमा गर्न चाहने बेलायती एजुकेसन प्रोभाइडरहरु, शिक्षा क्षेत्रसंग सम्बन्धित विज्ञ, प्रोफेसर लगायतको सहभागिता थियो ।

त्यसअवसरमा नेपालका लागि बेलायती राजदूत मोरिसले नेपालको पछिल्लो राजनीतिक तथा आर्थिक विकासक्रमको चर्चा गर्दै स्थिर सरकार निर्माणसंगै इच्छुक लगानीकर्ताहरुका लागि नेपालमा थप सहज वातावरण बनेको धारणा राखे । नेपाल सरकारका अधिकारीहरुसंगको भेटमा उनीहरु विदेशी लगानीमैत्री वातावरण निर्माणका लागि प्रतिवद्ध देखिएको समेत उनले बताए ।

ब्रिटेन नेपाल चेम्बर अफ कमर्सका अध्यक्ष तथा काठमाडौंस्थित द ब्रिटिश कलेजका सिइओ राजन कंडेलले नेपालमा बेलायती विश्वविद्यालयका कोर्सहरु सञ्चालन गर्दाका अनुभव सुनाए । नेपालमा बेलायती पाठ्यक्रम पढाउने अर्को नयां कलेज स्थापना गर्न लागेका कंडेलले नेपालमा बेलायती एजुकेसन प्रोभाइडरहरुका लागि रहेका अवसरबारे पनि जानकारी गराए ।

त्यसअवसरमा केपिएमजी इण्डियाकी स्नेहा जोसेफले नेपालको शिक्षा क्षेत्रबारेको एक रिपोर्ट प्रस्तुत गर्दै बेलायती एजुकेसन प्रोभाइडरुहरुका लागि सम्भाव्य बजारबारे जानकारी दिइन् ।

स्कटल्याण्डको राष्ट्रिय अवार्डिङ निकाय एसक्यूएकी प्रतिनिधि एसलिङ केलीले बेलायत तथा नेपालको शिक्षा क्षेत्रबीच भएको सहकार्यबारे एक ‘प्रिजेन्टेसन’ दिइन् ।

कार्यक्रममा बेलायत तथा नेपालको शिक्षा क्षेत्रसंग सम्बन्धित सहभागीहरुले नेपालमा बेलायती एजुकेसन प्रोभाइडरहरुका लागि के कस्ता अवसर छन् भन्नेबारे अन्तरक्रियात्मक छलफल समेत गरेका थिए ।

प्रतिक्रिया

सम्बन्धित सामाग्री

फेसबुक