लन्डन मेयर सादिक खान
लन्डन । नेपालीले मे ५ सांझ लन्डनको मुटु ट्राफलगर स्क्वायरमा गर्न लागेको बुद्ध जयन्तीमा लन्डन मेयर सादिक खान सहभागी नहुने भएका छन् । लन्डन मेयरलाई प्रमुख आतिथ्यका लागि निमन्त्रणा गरिएपनि उनको व्यस्त तालिकाले उनी नआउने भएका हुन् ।
मेयर कार्यालयबाट कम्युनिटी इन्गेजमेन्ट टिमकी लरेन डोहेर्टीले उक्त दिनका लागि मेयर खानले पहिले नै अन्यत्र प्रतिवद्धता व्यक्त गरिसकेकाले बुद्ध जयन्तीमा आउन नसक्ने अवगत गराएकी छन् । मेयर खानले निमन्त्रणाका लागि आभार व्यक्त गर्दै कार्यक्रम सफलताको कामना भने गरेका छन् ।
मेयर खान आउन नसक्ने भएपछि उनको सट्टा ब्रिटिश सांसद मिसेल डोनेलन प्रमुख अतिथीका रुपमा सहभागी हुने निश्चित भएको आयोजक मध्ये एक बुद्ध फाउण्डेशन यूकेका अध्यक्ष दीपक श्रेष्ठले जनाए । उनी चिपेनहाम क्षेत्रकी कन्जरभेटिभ सांसद हुन् । कार्यक्रममा सांसदहरु बीरेन्द्र शर्मा, सिमा मल्होत्रा पनि सहभागी हुने आशा गरिएको छ ।
बुद्ध फाउण्डेशन यूके र कपिलवस्तु समाज यूकेको संयुक्त आयोजना तथा नेपाली दूतावास एवं गैर आवासीय नेपाली संघसहितका संघसंस्थाको सहयोगमा बुद्ध जयन्ती मनाउने तयारी अन्तिम चरणमा छ । बुद्ध जन्मभूमिबारे भइरहेका भ्रम हटाउन र बुद्ध सन्देश प्रचार प्रसारका लागि विश्वभरका पर्यटक आवतजावत गर्ने ट्राफलगर स्क्वायर रोजिएको आयोजकले बताएका छन् ।
उक्त अवसरमा बुद्ध सम्वन्धि प्रवचन, पोस्टर चित्र प्रदर्शनी, दीप प्रज्वलन आदि प्रमुख आकर्षण रहनेछ । यसपटक आयोजकले अतिथीहरुबाट मन्तव्य भने पूर्ण कटौती गर्ने निर्णय गरेका छन् । लामो भाषणले कार्यक्रम पट्यारलाग्दो हुने भएपछि त्यस्तो निर्णय गरिएको हो ।
गत वर्ष पनि ट्राफलगर स्क्वायरमै र त्यसअघि पार्लियामेन्ट भवन अगाडि बुद्ध जयन्ती मनाइएको थियो ।
