बिहीबार, मंसिर ११ २०७७ | Thu, November 26, 2020
नेपालको समय: ०९:४७ | UK Time: 04:02

एनआरएनए यूकेको बक्सिङ शो च्यारिटी सफल भएको ठहर

वीनेपाली
२०७४ चैत २४ गते ११:३८


लन्डन । गैर आवासीय नेपाली संघ यूके 
(एनआरएनए यूके) ले गत ३१ मार्चमा अल्डरसटमा आपतकालिन कोषका लागि पहिलो पटक गरेको ‘च्यारिटी डिनर वीथ बक्सिङ शो’ सफल भएको ठहर गरेको छ । शुक्रबार सांझ समिक्षा बैठकमा एनआरएनए यूके पदाधिकारीले कार्यक्रम पृथक, भव्य र सभ्य भएको निष्कर्ष निकालेका हुन् । कार्यक्रमले नयां पुस्तालाई एकजुट गराउन र उनीहरुको खेल सम्भावनालाई थप उजागर गरेको पनि टिप्पणी गरेका छन् ।

उक्त च्यारिटी कार्यक्रमका संयोजक एनआरएनए यूके उपाध्यक्ष तथा च्यारिटी विभाग संयोजक प्रेम गाहामगरले मिडियासमक्ष च्यारिटीमा भएको खर्च र आम्दानी सार्वजनिक गरे । उनका अनुसार, २८ हजार १५ पाउण्ड कुल आम्दानी र २३ हजार ४२८ पाउण्ड खर्च भइ आपतकालिन कोषमा ४५८७ पाउण्ड (करिब ६ लाख ७३ हजार ८३० रुपैयां) वचत भएको छ ।

‘खेल आफैंमा खर्चिलो थियो र चुनौतिपूर्ण पनि’, संयोजक गाहामगरले भने, ‘पहिलोपटक उल्लेख्य रकम संकलन नभएपनि 
अर्को पटक धेरै र व्यवस्थापन पक्ष अझ सुधार गर्न सकिने आत्मविश्वास बढेको छ । खुशी के भने हामीले एनआरएनए यूकेले पनि यस्तो कार्यक्रम गर्न सक्ने रहेछ भन्ने प्रमाणित गरेका छौं ।’

गाहामगरले सहयोगदाता, प्रायोजक, अतिथी, मिडिया लगायत सबैप्रति आभार व्यक्त गरेका छन् ।

बैठकमा एनआरएनए यूके अध्यक्ष योगकुमार फगामीले बेलायतस्थित सबै संघसंस्था र व्यक्तिहरुको सामूहिक प्रयासले कार्यक्रम गर्व गर्न लायक भएको टिप्पणी गरे । ‘कोष त भविष्यमा पनि थपिंदै जाला तर कार्यक्रमले समुदायमा सकारात्मक सन्देश दिएको हाम्रो बुझाइ छ’, अध्यक्ष फगामीले भने, ‘भविष्यमा यसलाई अझ व्यवस्थित र खर्च न्यूनीकरणमा हामी सजग हुनेछौं ।’

फगामीका अनुसार उक्त कार्यक्रममा ४७ संघसंस्थाको प्रत्यक्ष सहभागिता र अप्रत्यक्ष रुपमा कयौंले सहयोग गरे । उनले आगामी मे ६ मा बस्ने संघको चौंथो कार्यसमिति बैठकमा च्यारिटीबारे अझ विस्तृत समिक्षा गरिने बताए ।

बैठकमा एनआरएनए यूके महासचिव आर के त्रिपाठीले बक्सिङ शोसहितको उक्त च्यारिटीले युवा परिचालन, उनीहरुको प्रचुर सम्भावना उजागर र सामुदायिक एकीकरणमा इट्टा थपेको बताए । ‘सधैं एकै खालको कार्यक्रम भन्दा यसपटक केही पृथक गर्ने सोचले कार्यक्रम आंटियो’, त्रिपाठीले भने, ‘सबैको हातेमालोले सफल पनि भयो । यसले अन्य एनसीसीलाई पनि प्रेरित गरेको छ ।’

कार्यक्रममा एनआरएनए यूके सदस्य तथा धर्म विभाग संयोजक होमनाथ पौडेल, मिसेस नेपाल टिमका तर्फबाट मनिषा डंगोल श्रेष्ठ, आस्था जोशी, गिता बस्नेत पाण्डे, अमृता गिरी गजुरेल लगायतले आ आफ्नो अनुभव सुनाएका थिए । मिसेस नेपाल टिमले च्यारिटी एकदम नौलो भएको जनाउंदै आफूहरुलाई त्यसमा विशेष प्राथमिकता दिएकामा एनआरएनए यूकेप्रति आभार व्यक्त गरेको छ ।

उक्त ‘च्यारिटी डिनर वीथ बक्सिङ शो’ लाई बेलायतको नेपाली समुदायले फरक मानेको छ । चार सय १५ जना सहभागी उक्त कार्यक्रममा राजदूत डा. दुर्गाबहादुर सुवेदीसहित ब्रिटिश प्रोफेसनल बक्सरहरु वल्ड नम्बर थ्री जोन राइडर, १९९६ लन्डन एबीए फाइनलिस्ट अलान साउथवीक, ग्रेट ब्रिटेन बक्सिङ टिमका नम्बर २ खेलाडी क्रिस ब्रोक, यूरोपियन च्याम्पियन आदिप राना विशेष अतिथीका रुपमा थिए भने बेलायतका विभिन्न क्लब आवद्ध खेलाडीहरु रिङमा भिडेका थिए ।

तस्विर- शिव भण्डारी

प्रतिक्रिया

सम्बन्धित सामाग्री

फेसबुक