शताब्दी पुरुषलाई सवारी र सुरक्षाकर्मी

वाङमय शताव्दी पुरुष डा.सत्यमोहन जोशी । फाइल तस्विर – प्रदीपराज वन्त, रासस

ललितपुर, १९ चैत – ललितपुर महानगरपालिकाले वाङ्मय शताब्दी पुरुष सत्यमोहन जोशीलाई सम्मानस्वरुप चालकसहित सवारी साधन र एक सुरक्षाकर्मी प्रदान गरेको छ ।

महानगरपालिकाका प्रमुख चिरीबाबु महर्जनले जोशीलाई सम्पर्क गर्न मोबाइलसहित सो सवारी साधन हस्तान्तरण गर्नुभयो । सो अवसरमा जोशीले महानगरपालिकाले गरेको सम्मानबाट आफूले गौरवको महसुस गरेको बताउनुभयो । महाननगर प्रमुख महर्जनले जोशीजस्ता महान् व्यक्तिलाई सम्मान गर्न पाउँदा आफूलाई सौभाग्यशाली ठानेको बताउनुभयो ।

गाडीका लागि आवश्यक खर्चसमेत महानगरपालिकाले बेहोर्ने बताइएको छ । यही चैत १५ गते बसेको महानगरकार्यपालिकाको बैठकले जोशीलाई सुरक्षाकर्मी र सवारी साधन प्रदान गर्ने निर्णय गरेको थियो ।