जातीय द्वन्द्वका कारण ४० को मृत्यु

बुनिआ, लोकतान्त्रिक गणतन्त्र कंगो, १८ फागुन – लोकतान्त्रिक गणतन्त्र कंगो (डिआर कंगो) को माजेमा बिहीबार देखि शुक्रबारसम्म भएको भिडन्तमा परी कम्तीमा ४० जनाको मृत्यु भएको छ ।

हेमा र लेन्डु नाम गरेका दुई जातिकाबीच इतुरी प्रान्तमा अन्तरजातीय भिडन्त भएको सुरक्षाकर्मी र स्थानीय श्रोतले जनाएका छन् ।

श्रोतका अनुसार मारिएका मध्ये अधिकांश हेमा जातीय समुदायका छन् । उनीहरूलाई लेन्डु आक्रमणकारीरूले एक्कासी रातको समयमा गाँउमै गएर आक्रमण गरेका थिए ।

घटनास्थलमा पूर्ण शान्ति सुरक्षा कायम गर्न सुरक्षा अधिकारीहरुको बैठक बसेको इतुरी प्रान्तका गभर्नरले सिन्ह्वालाई जानकारी दिनुभयो ।

‘आक्रमणमा परी मारिएकाहरूको शव अहिले सम्म पनि माजेको घटनास्थलमै छ, अन्त्येष्टि गर्नु अघि केन्द्रीय सरकारका मानवीयता सम्वन्धी मन्त्रीले घटनास्थलमै गएर शवहरु अवलोकन गर्नुहुने छ भन्ने हामीले चाहेका छौं’- इतुरी नागरिक समाजका अध्यक्ष जेअन बोस्को लालोले भन्नुभयो ।

दुई महिना अगाडी देखि भएको हेमा र लेन्डु दुई जातबीचको भिडन्तका क्रममा यसअघि एक सय भन्दा बढीको मृत्यु भएको छ । सदरमुकाम तय सम्बन्धी विवादका कारण उनीहरूबीच भिडन्त हुदै आएको छ ।

बेला बेलामा भइरहने भिडन्तमा परी हजारौ घर जलाइएका छन् भने ६० हजार भन्दा बढी स्थानीय बासिन्दा बुनिआतर्फ विस्थापित भएका छन् ।