साढे दुई लाख बढी सिरियाली विस्थापित

द्वन्द्वका कारण सिरियालीहरु विस्थापित हुने क्रम जारी छ । तस्विर- एएफपी

संयुक्त राष्ट्रसंघ, १७ माघ – सिरियाको सरकारी फौजले यहाँका विभिन्न स्थानमा विपक्षी विद्रोहीहरु विरुद्ध हवाई आक्रमण थालेपछि पछिल्लो समयमा विस्थापित हुनेको सङ्ख्या बढेको संयुक्त राष्ट्रसंघले जनाएको छ ।

सिरियाली सरकारले गत डिसेम्बरयता यहाँको उत्तरी क्षेत्र हामा र दक्षिणी इड्लिबमा बढी आक्रमण गरेको बताइएको छ । जसका कारण यी क्षेत्रबाट मात्र साढे दुई लाखभन्दा बढी सिरियाली भागेर अन्यत्र सरेका वा विदेशिएका छन् ।

देशभित्रै आन्तरिक शरणार्थीका रुपमा बसिरहेका देशको उत्तरपश्चिमी क्षेत्रबाट अन्यत्र सरेका छन् । विस्थापितमध्ये धेरैजसो परिवार अस्थायी पालमा बाँचिरहेका बताइएको छ ।

राष्ट्रसंघको शरणार्थीसम्बन्धी सहायता निकायले दक्षिणी इड्लिब र उत्तरी हामामा गत डिसेम्बर १५ यता भएको हवाई हमला र काबारहीका कारण दुई लाख ७० हजारभन्दा बढी सिरियाली विस्थापित भएका बताएको छ ।

ती आक्रमणका कारण मानिस भागेका र उनीहरुको सहायताका लागि स्थानीय निकायले अवरोध पुरयाउँदा सहायता सामग्री पनि द्वन्द्वग्रस्त क्षेत्रमा पुग्न नसकेको राष्ट्रसंघले जनाएको छ ।

ती क्षेत्रका अस्पताल र क्लिनिकमाथि पनि हमला भएको बताइएको छ । यसका कारण पनि नागरिकलाई विस्थापित हुन बाध्य बनाएको छ ।

सिरियाली फौजले कतिपय अवस्थामा रूसी सेनाको सहयोगमा आक्रमण गरेको छ । टर्कीको सेनाले पनि उत्तरी सिरियामा कारबाही थालेपछि त्यसले ठूलो क्षति निम्त्याएको छ ।

प्रतिक्रिया

सम्बन्धित सामाग्री