काबुल होटल आक्रमणमा १४ विदेशी र चार अफगानीको मृत्यु 

काबुल, अफगानिस्तान, ७ माघ – अफगान सुरक्षा फौजले १२ घण्टाको संघर्षपछि राजधानी काबुलस्थित इन्टरकन्टिनेन्टल होटलमाथि आफूले नियन्त्रण हासिल गरेको जनाएको छ ।

होटललाई हमलाकारीको आक्रमणबाट सुरक्षित गर्ने र होटेलमा रहेका ग्राहक तथा कर्मचारीको उद्धार गर्ने क्रममा १४ विदेशीसहित चार जना अफगानी नागरिकको ज्यान गएको यहाँको गृह मन्त्रालयले जनाएको छ ।

‘आतङ्कबादीहरुले आक्रमण गरेपछि सुरक्षाकर्मीले जवाफी आक्रमण गरेका थिए’- गृह मन्त्रालयका प्रवक्ता नाजीब डेनिसले स्थानीय सञ्चारमाध्यमसँग बताउनुभयो ।

आतङ्कवादीको नियन्त्रणमा के कति मान्छे छन् या छैनन् भन्ने बारेमा केही स्पष्ट हुन नसकेको अधिकारीले बताएका छन् । घटनास्थलमा कुनै सञ्चारकर्मी तथा आम मान्छेको प्रवेशमा रोकी कारबाही थालिएको थियो ।

घटनास्थलमा उद्धारका लागि पुगेका एम्बुलेन्सलाई समेत होटल नजिकै लाइनमा राखेर होटललाई सुरक्षा नियन्त्रणमा लिइएको थियो ।

होटल आक्रमणमा संलग्न सवै हमलाकारी मारिएका छन् ।

आक्रमणको कुनै पनि समूहले जिम्मेवारी लिएको छैन । तर सरकारी सुरक्षाफौजले घटनामा तालिवानी समूहको संलग्नता रहेको आशङ्कामा छानविन शुरु गरेको छ ।