सोमबार, कार्तिक १० २०७७ | Mon, October 26, 2020
नेपालको समय: १९:३८ | UK Time: 13:53

बौद्धमार्गीहरुको रयालीमा गोली प्रहार, सातको मृत्यु

रासस-एएफपी
२०७४ माघ ३ गते १९:२८

याङ्गुन, ३ माघ – म्यानमारको राखिन राज्यमा बौद्ध धर्मावलम्बीहरुले निकालेको रयालीमा प्रहरीले गोली प्रहार गरेको समाचार छ ।

सो गोलीकाण्डमा परी सात व्यक्तिको मृत्यु भएको छ । अरू कैयौँ घाइते भएका समाचारमा जनाइएको छ ।

बौद्ध धर्मावलम्बीहरुले मङ्गलबार निकालेको रयाली अपराह्नतिर एक सरकारी कार्यालय कब्जा गर्नेतर्फ लम्किएको प्रहरीको भनाई छ ।

एकजना प्रहरी अधिकारीले भनेका छन्– ‘उक्त रयालीमा जम्मा भएका व्यक्ति सरकारी कार्यालय कब्जा गर्नेतर्फ अघि बढेपछि प्रहरीले गरेको कारबाहीको क्रमका सात व्यक्तिको मृत्यु भएको हो ।’

साथै यस झडपमा परी अरू एक दर्जनभन्दा बढी व्यक्ति घाइते भएको प्रहरीले एएफपी समाचार समितिलाई बताएको छ ।

रोहिंग्या मुसलमान समूदायको बलियो प्रभाव रहेको भनिएको सो राज्यबाट हाल छ लाखभन्दा बढी रोहिंग्या भागेर बङ्गलादेश पुगेका छन् । उक्त राज्यमा गएको केही महिनादेखि भएको सैनिक दमनका कारण अस्तव्यस्त भएको छ । राखिनमा रहेको ऐतिहासिक मन्दिर परिसर एमरक युमा हजारौँको सङ्ख्यामा बौद्ध धर्मावलम्बी प्रर्दशनकारी जम्मा भएका थिए । जुलुस के कति कारणले अचानक हिंसामा परिणत भएको हो भने बारेमा केही प्रष्ट हुन सकेको छैन ।

प्रहरीले हिंसामा उत्रेको भीडलाई तितरबितर पार्न चेतावनीस्वरुप रबरको गोली प्रहार गरेको र प्रर्दशनकारीहरु त्यसपछि पनि नरोकिएपछि गोली नै प्रहार गर्न बाध्य भएको बताएको छ ।

म्यानमार प्रहरीका प्रवक्ता कर्णेल म्यो सोएले एएफपी समाचार समितिलाई बताएअनुसार उक्त भीडले सरकारी कार्यालयमा कब्जा गर्न खोजेको र त्यसपछि प्रहरीले बाध्य भएर गोली हान्नु परेको थियो ।

गएराति एमरक यु मन्दिर परिसरमा भएको यस हिंसामा सातको मृत्यु हुनुका साथै अन्य २० भन्दा बढी घाइते भएको प्रहरी प्रवक्ता सोएले बताउनुभएको छ ।

प्रतिक्रिया

सम्बन्धित सामाग्री

फेसबुक