तस्विर- रोयटर्स
बैंकक, थाइल्याण्ड, माघ २ – लाखौँको सङ्ख्यामा म्यानमारबाट बङ्गलादेशका विभिन्न भागमा बसोबास गर्दै आएका रोहिन्ज्या मुशलमानलाई आगामी दुई बर्षभित्र फिर्ता गर्ने लक्ष्यसहित सहमति भएको बङ्गलादेशका अधिकारीले जनाएका छन् ।
मङ्गलबार बङ्गलादेशको विदेश मन्त्रालयले शरणार्थी फिर्ता गर्न गठन भएको दुई देशको संयुक्त कार्यदलले आफूलाई दिएको काम सोमबार सम्पन्न गरेको र आगामी दुई बर्षभित्र लाखौँको सङ्ख्यामा बङ्गलादेशका विभिन्न ठाउँमा रहेका रोहिन्ज्या शरणार्थीलाई फिर्ता गर्ने लक्ष्यका साथ सहमति गरिएको बताएको छ । शरणार्थी फिर्ता प्रक्रिया आगामी दुई बर्षमा सक्नेमा दुबै देशका प्रतिनिधि सहमत भएका छन् ।
म्यानमार र बङ्गलादेशले शरणार्थी फिर्ताका लागि गत नोभेम्बरमा शुरुवाती सहमति गरी कार्यदल बनाएर उक्त कार्यलाई व्यवस्थित गर्न जिम्मेवारी तोकिएको थियो ।
सहमति अनुसार म्यानमारले हरेक हप्ता १५ सय जना रोहिन्ज्या शरणार्थीलाई फिर्ता लग्ने बङ्गलादेशले जनाएको छ ।
दुई वर्षभित्रमा शरणार्थीहरू फिर्ता भइसक्ने दुवै देशले आशा व्यक्त गरेका छन् । बङ्गलादेशको सीमाक्षेत्रमा बनाइएका अस्थायी शिविरहरूमा साढे ६ लाखभन्दा बढी रोहिन्ज्या शरणार्थी बस्दै आएका छन् ।
