बेलायतमा गरिएको नागरिक सम्मान ‘गैर कानुनी’

लन्डन । बेलायतको लन्डनमा मंगलबार गरिएको नागरिक सम्मान ‘गैर कानुनी’ पाइएको छ । एक संस्थाको निम्तोमा बेलायत आएर अर्कै व्यक्तिको आयोजनामा उक्त ‘कथित’ नागरिक सम्मान गरिएको हो ।

थर्ड आइको निम्तोमा टियर ५ भिजा लिएर करिब ६ महिनाअघि फिल्म अवार्ड गर्न बेलायत आएका थिए आर के सुवेदी । अहिले त्यही भिजामा बेलायत आएर सुवेदीले थर्ड आइसंग परामर्श र अनुमति नलिइ व्यवसायी सुरेन्द्रप्रसाद श्रेष्ठसंग व्यवसायिक रुपमा कार्यक्रम गरेका हुन् । सुवेदीले श्रेष्ठसंग मिलेर जुन कार्यक्रम गरे, त्यो बेलायतको कानुन अनुसार गैर कानुनी छ । ‘थर्ड आइले नै गरेको कार्यक्रममा सुवेदी आउन सक्छन् तर अर्कै व्यक्तिको आयोजनामा उनलाई व्यवसायिक कार्यक्रम गर्न कानुनले दिंदैन’, जानकार बताउंछन् ।

एउटा कार्यक्रमका लागि भनि लिएको भिजा अर्को व्यवसायिक प्रयोजनका लागि प्रयोग गरिनु वा कार्यक्रम सञ्चालन गरिनु गैर कानुनी मानिन्छ । यदि नयां कार्यक्रम गर्ने हो भने पुन आवेदन दिई बेलायतमा विधिवत दर्ता भएको संस्थाले सर्टिफिकेट अफ स्पोन्सरसीप (सिओएस) पठाएपछि मात्र कार्यक्रम गर्न सक्ने व्यवस्था छ । यो नियम उल्लंघन गरे बेलायत सरकारले अध्यागमन नियम उल्लंघनको आधारमा यहां आउन दश वर्षसम्म प्रतिवन्ध लगाउन सक्ने प्रावधान छ । गैर कानुनी कार्यमा साथ दिइ कार्यक्रम सञ्चालन गर्नु पनि आफैंमा अध्यागमन नियमको उल्लंघन हो ।

बेलायत संयोजक श्रेष्ठले कार्यक्रमको शीर्षकमा विभिन्न प्रायोजकहरुसंग रकम उठाएका छन् । टिकट शुल्क जनही तीस पाउण्ड उठाइएको छ । कुन व्यक्ति वा कम्पनीबाट कारोबार वा रकम संकलन गरिएको हो, त्यस हिसावको लेखाजोखा स्पष्ट हुन यहां अनिवार्य छ ।

सम्मानमा बिक्नेहरु पत्रकार विरुद्ध…

नागरिक सम्मानमा बिक्ने केही कथित वरिष्ठहरु पत्रकार विरुद्ध जाइ लागेका छन् । कार्यक्रमलाई पत्रकारहरुले शतप्रतिशत बहिष्कार गरेपछि आक्रोशित केही सम्मानितहरुले सञ्चारकर्मीलाई तारो बनाएका हुन् । उक्त सम्मान छनोट गरिएका अधिकांश अग्रजहरुले नै ‘बहिष्कार’ गरिदिएका थिए ।

आफूलाई वरिष्ठ कलाकार बताउने गोर्खा क्लवका मालिक मनिष श्रेष्ठले पत्रकारहरुलाई ‘आयोजकबाट हटेपछि तथ्यभन्दा बाहिर गएर समाचार लेखेको’ आरोप लगाउंदै ‘स्वघोषित’ ठूला पत्रकारहरुले ‘सिन्डीकेट’ लागू गर्न खोजेको जिकिर गरेका छन् ।

कार्यक्रम सञ्चालनका क्रममा पनि उनी पत्रकारहरुप्रति खनिए । सम्मानको ऋण तिर्न उनले पत्रकारहरुलाई ‘सके समर्थन गर्न नसके चुप लागेर बस्न’ धम्की दिए । उनले गलत उद्देश्यले प्रेरित कार्यक्रमलाई समर्थन नगरेको झोकमा ‘गलत संस्कार र खुट्टा तान्ने प्रवृत्ति विकास’ भएको आक्षेप समेत लगाए । श्रेष्ठले आयोजकप्रति कृतज्ञ भएर जति गुणगान गाएपनि उक्त सम्मानलाई बेलायतको समस्त नेपाली समुदायले बहिष्कार गरिदिएको छ ।

उनले नेपालमा नबिकेका चलचित्र लन्डनमा प्रदर्शन गर्दा दर्शक आएनन् भने पनि त्यो आक्रोश फेसबुकमा ओकल्ने गरेका छन् । श्रेष्ठको यस्तै रवैया बढे उनका भावी कार्यक्रम नै बहिष्कार गर्ने कतिपय पत्रकारहरुको चेतावनी छ ।