तस्विर- एएफपी
लन्डन । इन्गेजमेन्ट (मगनी) गरेको केही दिनपछि बेलायतका राजकुमार हयारी र उनकी हुने वाला जीवनसाथी (फिओन्से) मेघान मर्केलले शुक्रबार पहिलो औपचारिक शाही भ्रमण गरेका छन् । उनीहरुले स्वागत भोजसहित बेलायती शहर नोटिङघमको भ्रमण गरेका हुन् ।
राजकुमार हयारीको जोडीले नोटिङघममा विश्व एड्स दिवसको अवसर पारेर आयोजना गरिएको मेलाको पनि अवलोकन गरे ।
उनीहरुले एचआइभी एड्स विरुद्धको अभियानमा लागिरहेका अभियन्ताहरूलाई पनि भेटेर हौसला प्रदान गरेको बताइएको छ । सो अवसरमा समर्थकहरूले हयारी र मेघानको सम्मानमा नाम लिएर नारा लगाएका थिए ।
बेलायती महारानी एलिजावेथ द्वितीयका नाती हयारीले अमेरिकी नायिकासमेत रहेकी मर्केलसँग केही महिना अगाडि देखि प्रेम सम्वन्ध गांसेका थिए । हयारी र मेघानले अर्को वर्ष वसन्त ऋतुमा विवाह गर्ने घोषणा गरेका छन् तर मिति एवं अन्य विस्तृत विवरण सार्वजनिक भएको छैन् ।
तस्विर- एपी
