बेलायती राजकुमार हयारीको मेगनसंग बिहे पक्का

लन्डन । बेलायती राजकुमार हयारीले आफ्नी गर्लफ्रेण्ड अमेरिकी नायिका मेगन मर्केलसंग बिहे गर्ने पक्का भएको छ । सन् २०१८ को वसन्त ऋतुमा दुई बीच बिवाह गर्ने तय भएको क्लेरेन्स हाउसले सोमबार औपचारिक जानकारी दिएको हो ।

बिवाहको विस्तृत विवरण पछि सार्वजनिक गर्ने बताइएको छ । राजकुमार ह्यारीले मर्केलसँग मगनी गरेर सोमबार दुई जनाको संयुक्त फोटो सार्वजनिक गरेका छन् । हयारीले महारानी तथा अन्य निकट राजपरिवार सदस्यहरुलाई समेत जानकारी गराएको उल्लेख छ । एक विज्ञप्तिमा हयारीले विवाह पक्का भएकोबारे घोषणा गर्न पाउँदा आफूलाई खुसी लागेको र विवाहको लागि मर्केलको बाबुआमाको आशीर्वाद पनि पाएको बताएका छन्  ।

३३ वर्षीय हयारी विगत १६ महिनादेखि आफूभन्दा जेठी ३६ वर्षीया मेगनसंग लभ अफेयर्समा थिए । बिवाहपछि उनीहरु केन्जिङटन प्यालेसको नटिङहाम कटेजमा बस्ने छन् । राजकुमार हयारीले बेलायती राजपरिवारका सदस्यहरु मध्येबाट पाँचौ पालोमा राजगद्दी सम्हाल्ने छन् ।

हयारीको नेपाल र विशेषगरि ब्रिटिश गोर्खासंग आत्मिय सम्वन्ध छ । भूकम्पपछि भएको हयारीको नेपाल भ्रमणले पर्यटन प्रवर्धन र बेलायत नेपालबीच दौत्य सम्बन्ध अझ मजवुत भएको विश्वास गरिन्छ ।