‘अन्डर एज’ लाई अल्कोहल बेचेपछि गोर्खाद्वारा सञ्चालित पसलको लाइसेन्स खारेजी प्रक्रियामा

लन्डन । तीनपटकसम्म कम उमेरका ग्राहकलाई मादक पदार्थ बेचेको पाइएपछि ह्याम्पशायर काउन्सिलले फार्नबरोस्थित एभरेष्ट क्याश एण्ड क्यारीको मादक पदार्थ बिक्री लाइसेन्स पुनरावलोकन गर्न लागेको छ । 

ह्याम्पशायर कन्स्टाब्युलरीले गएको फेब्रुअरी तथा अक्टोबर महिनाको बीचमा कम उमेरका स्वयम्सेवीहरुलाई उक्त पसलमा रक्सी किन्न पठाएको थियो ।

तीनै पटक कोभ रोडस्थित एभरेष्ट क्याश एण्ड क्यारीले कम उमेरका ग्राहकलाई मादक पदार्थ बिक्री गरेको र एक पटक त पसलमै काम नगर्ने व्यक्तिले एकजना १६ वर्षीय ग्राहकलाई मदिरा बिक्री गरेको www.getsurrey.co.uk वेबसाइटमा प्रकाशित समाचारमा जनाइएको छ ।

गत अक्टोबर महिनामा ह्याम्पशायर काउन्टी काउन्सिल ट्रेडिङ स्टान्डर्डसले एभरेष्ट क्याश एण्ड क्यारीलाई दिइएको लाइसेन्स पुनरावलोकन गरियोस् भनेर आवेदन दिएको छ जसबारे यही नोभेम्बर २३ तारिखमा सुनुवाइ हुन लागेको पनि समाचारमा जनाइएको छ । 

काउन्सिलका अधिकारीहरुले उक्त पसललाई प्रशिक्षण दिन चाहेको तर पसलले नै त्यस्तो प्रशिक्षण लिन नचाहेको समाचारमा उल्लेख छ । भाषाको समस्याका कारण एभरेष्ट क्याश एण्ड क्यारीलाई जरिवाना गर्न गाह्रो भएको त्यसैले अब उसलाई दिइएको मदिरा बिक्रीको अनुमतिपत्र खारेज गरिनुपर्ने ह्याम्पशायर कन्स्टाब्युलरीले माग गरेको छ । 

बेलायतको कानुन अनुसार १८ वर्ष मुनीकालाई मादक पदार्थ बेच्न प्रतिवन्ध छ र त्यो नियम उल्लंघन गरेमा लाइसेन्स खारेजीसंगै ५ हजार पाउण्डसम्म जरिवाना हुन सक्छ । ग्राहकको उमेरमा शंका लागे पसलेले परिचयपत्र माग्न वा सामान नबेच्न सक्ने अधिकार पनि हुन्छ ।

भूतपूर्व गोर्खाहरुद्वारा सन्चालन गरिएको सो पसलका सन्चालकको भनाइ भने समाचारमा उल्लेख गरिएको छैन ।