लन्डन । लन्डनस्थित नेपाली दूतावासमा नयां सैनिक सहचारी (मिलिट्री अट्याची) आउने भएका छन् । हालका सैनिक सहचारी कर्णेल प्रदीपजंग केसीको तीन वर्ष कार्यकाल सकिनै लागेकाले केसीको ठाउंमा कर्णेल कुमार थापा आउन लागेको दूतावास श्रोतले जनाएको छ । ‘उहांको भ्रमणको आइटिनरी आइसकेको छैन् तर नोभेम्बर दोश्रो सातादेखि नयां सैनिक सहचारीले दूतावासमा कार्यभार सम्हाल्ने सम्भावना छ’, श्रोतले भन्यो ।
दूतावासमा अक्टोबर अन्तिममा केसीको विदाइ कार्यक्रमको तयारी छ ।
सन् १९३४ मा स्थापित लन्डन मिसनमा केसी २३ औं सैनिक सहचारी हुन् । बेलायत नेपालबीच सैनिक सम्वन्ध विस्तार र सहयोग आदानप्रदानमा सैनिक सहचारीको भूमिका प्रमुख रहन्छ ।
कर्णेलको घरमा चोरी
यसैबीच, कर्णेल केसीको घरमा चोरी भएको समाचार छ । क्वीन्सबरीस्थित घरमा कोही नभएको बेला चोरले कम्तीमा दश तोला सुन र नगद चोरेको बताइएको छ । दूतावासले भाडा तिरेर सैनिक सहचारी र परिवारलाई घर उपलव्ध गराएको छ ।
बेलायतको नेपाली समुदाय पछिल्लो समय सुन चोरीबाट आक्रान्त छ । नेपालीको जनसंख्या उल्लेख्य भएको ठाउंमा नेपालीका गरगहनामाथि लुटेराले ‘टार्गेट’ गरेका घट्ना बढ्दै गएका छन् । केही समय अघि हन्स्लोमा नेपालीको करिब २५ लाख रुपैयांको सुन चोरी भएको थियो भने अल्डरसटमा दिनदहाडै दुई युवाले एक वृद्धा महिलाको घांटीबाट ६ तोला सुनको नेक्लेस थुतेर लगेको घट्ना धेरै पुरानो भएको छैन् ।
