लन्डन । लन्डनस्थित सफल व्यापारिक समूह कंडेल ग्रुपको द ब्रिटिश कलेजले एनआरएनए नवनिर्वाचित पदाधिकारीलाई सम्मान तथा बधाइ दिएको छ । आठौं विश्व सम्मेलनले नयां नेतृत्व चयन गरे लगत्तै एनआरएनका नवनिर्वाचित अध्यक्ष भवन भट्टसहित अन्य पदाधिकारीलाई कलेजले काठमाण्डौंमा सम्मान गरि बधाइ दिएको हो ।
एक समारोहबीच कलेजका निर्देशकद्वय महेन्द्र कंडेल र नरेन्द्र कंडेलले अध्यक्ष भट्टसंगै उपाध्यक्षद्वय कुमार पन्त र कुल आचार्य, कोषाध्यक्ष हिक्मत थापा लगायतलाई खादा ओढाएर सम्मान गरेका थिए । कार्यक्रममा कलेजका निर्देशक महेन्द्र कंडेलले गैर आवासीय नेपाली संघको नयां नेतृत्वलाई बधाई दिंदै सफल कार्यकालको शुभकामना दिए । महेन्द्र कंडेल एनआरएनए यूकेका पूर्व अध्यक्ष हुन् । लामो समयदेखि एनआरएन अभियानमा सक्रिय कंडेलले एनआरएनको दायरा फराकिलो हुनुपर्छ भन्दै आफ्नो पालामा विद्रोह गरि संस्थागत सुधारको प्रयास गरेका थिए ।
सम्मान ग्रहणपछि अध्यक्ष भट्टले ब्रिटिश कलेजलाई धन्यवाद दिंदै बेलायती गुणस्तरको उच्च शिक्षा नेपालमै सञ्चालन गरेकामा कलेजको प्रशंसा गरे । आगामी दिनमा एनआरएनका कयौं प्रोजेक्टमा ब्रिटिश कलेजसंग सहकार्य हुने आशा समेत भट्टले व्यक्त गरे ।
ब्रिटिश कलेजले एनआरएनए यूकेको नयां कार्यसमितिलाई पनि सम्मान गरयो । अध्यक्ष योगकुमार फगामी, उपाध्यक्षहरु ललित न्यौपाने, पुनम गुरुङ, शेरबहादुर सुनार र सुशिला राई, उपमहासचिव विनय अधिकारी, सदस्य अर्कराज तिमल्सिना लगायतलाई सम्मान गरिएको हो ।
त्यस्तै बुद्ध फाउण्डेसन यूके अध्यक्ष दिपक श्रेष्ठ, नेपाली जनसम्पर्क समिति बेलायतका महामन्त्री केशव भण्डारी, पशुपतिनाथ मन्दिर लन्डनका अध्यक्ष सहदेव गिरी, एकाउण्टेन्ट एलएन पाण्डे लगायतलाई पनि खादा ओढाएर सम्मान गरियो ।
