लन्डन । एसियाको नोबेल पुरस्कार मानिने रामोन म्यागासेसे पुरस्कार विजेता तथा सामाजिक अभियन्ता महावीर पुन युके आउने भएका छन् ।
नेपालका दुर्गम वस्तीलाई इन्टरनेटसम्म जोड्ने अभियान चलाएका पुन अहिले राष्ट्रिय आविष्कार केन्द्र स्थापनाका लागि जोडतोडले लागि परेका छन् ।
हिमालयन ब्याडमिन्टन क्लब, लन्डनको निमन्त्रणामा पुन यही अक्टोबर ५ मा लन्डनको हिथ्रो एयरपोर्ट अवतरण हुने बताइएको छ । झन्डै एक महिना लामो बेलायत यात्राका क्रममा उनले राष्ट्रिय आविष्कार केन्द्रका बारेमा बेलायतको विभिन्न क्षेत्र, व्यक्ति र संस्थाहरुसित अन्तरक्रिृया गर्ने कार्यक्रम छ । पुनले अक्टोबर ८ मा निरमाया रेष्टुरेन्ट अल्डरसट, १४ मा मेड्स्टोन फेमेली चर्च मेड्स्टोन र १५ मा हेरिटेज सेन्टर ननिङटनमा कार्यक्रम गर्ने छन् । यसैगरी अक्टोबर २४ मा युनिभर्सिटी अफ वेस्ट स्कटल्याण्ड लन्डन, २७ मा एम्पायर हल अल्डरसट र २९ मा फुल्फोर्ड ब्यारेक योर्कमा अन्तरक्रिया कार्यक्रमहरु तय भएका छन् ।
पुन राष्ट्रिय आविष्कार केन्द्रको स्थापना गरी नेपाललाई अनुसन्धान र विकासको संस्कारमा प्रेरित गर्ने र देशलाई तीव्र गतिमा विकास गर्न चाहन्छन् । केन्द्रको स्थापनालाई दीर्घकालीन राष्ट्र निर्माणको अभियानसित तुलना गर्दै उनले नेपाललाई माया गर्ने सबै ब्यक्ति, संस्था, समुदायलाई यस अभियानमा सहभागी हुन अनुरोध गरेका छन् । अभियानमा सहभागी हुन आर्थिक सहयोग नै गर्नुपर्छ भन्ने मान्यता नराख्ने पुन अन्तरक्रिया कार्यक्रममा उपस्थित भएर वा आविष्कार केन्द्रको विषयमा जानकारी लिएर पनि सहयोग गर्न सकिने बताउंछन् । जसका लागि संयोजक कुल राई – 07703811507, गंगा थापा – 07837 625121, मिलन राई – 07913 0578 वा क्याप्टेन अब्तार श्रेष्ठ – 07446 023585 लाई सम्पर्क गरी सहभागी हुने सकिने छ ।
