लन्डन । बेलायतको सांगीतिक टुरबाट छोटो ‘ब्रेक’ लिएर चर्चित संगीतकार कालिप्रसाद बास्कोटा र गायक हेमन्त राना बिहीबार कतार उडेका छन् । नेपाल आइडल ग्राण्ड फिनालेका लागि उनीहरु कतारतर्फ प्रस्थान गरेका हुन् ।
बास्कोटा नेपाल आइडलका जज हुन् भने रानाले त्यहां कार्यक्रम प्रस्तुत गर्नेछन् । नेपाल आइडलको फिनाले सकिए लगत्तै ति कलाकार बेलायतका बांकी कार्यक्रममा सहभागी हुन फेरि लन्डन फर्कने कार्यक्रम छ ।
भोलि आश्विन ६ गते शुक्रबार (सेप्टेम्बर २१ तारिख) कतारको एसियन टाउन एम्पिथिएटर ग्राण्डमल, सनाया दोहामा सांझ ५ बजे ग्राण्ड फिनाले हुंदैछ । उक्त अन्तिम प्रतिष्पर्धालाई विश्वभरका नेपालीले चासो पूर्वक हेरेका छन् । आ आफ्नो पक्षका प्रतिभालाई जिताउन अहिले स्वदेश र विदेशमा रहेका नेपालीले अनलाइन भोटिङ गरिरहेका छन् ।
नेपाल आइडलको टप थ्रीमा प्रताप दास, बुद्ध लामा र निशान भट्टराई पुगेका छन् । नेपाल आइडललाई नेपाली सांगीतिक फांटमा एउटा ऐतिहासिक फड्कोका रुपमा हेरिएको छ ।
नेपाल आइडलका अन्तिम तीन प्रतियोगीको हौसला बढाउन लोकप्रिय कलाकारहरु मदनकृष्ण श्रेष्ठ र हरिवंश आचार्य (मह) कतार पुगेका छन् । अन्य टप टेनभित्र परेका प्रतियोगी र अतिथी कलाकारहरु समेत कतार जाने क्रम जारी छ । फिनालेलाई एपी वान एचडी टिभीले लाइभ ब्रोडकास्ट गर्ने कार्यक्रम छ ।
काली र हेमन्त नेपाल आइडल सकेर शनिबार बिहान लन्डन आउने कार्यक्रम रहेको बेलायत सांगीतिक टुरका एकजना आयोजक सिद्धार्थविक्रम क्षेत्रीले जानकारी दिए ।
श्री सिद्धार्थ एवं नेपलिज इन्टरटेन्मेन्ट ग्रुपले विजया दशमी शुभकामना सांझ गरेको हो । काली र हेमन्तका साथ मोडल सुष्मा कार्की पनि यूके टुरमा छन् । उनीहरुको पहिलो शो अल्डरटस्थित एम्पायर हल र दोश्रो शो लन्डन साउथ हयारोस्थित हयारो बरो फुटबल क्लवमा अत्यधिक सफलताका साथ सम्पन्न भइसकेको छ भने आगामी २३ सेप्टेम्बरमा रेडिङस्थित किन्की कोला, २४ सेप्टेम्बरमा आसफोर्ड नोर्टन न्याचबुल स्कुल हल र १ अक्टोबरका दिन गेटवे हाउस उलवीच लन्डनमा हुने कार्यक्रम छ । पिटरबरो र लन्डनका अन्य शहरमा समेत कार्यक्रम गर्न डिमाण्ड बढेपछि आयोजक थप शो गर्ने तयारीमा छन् ।
यसैबीच, कलाकारहरु कालिप्रसाद बास्कोटा, हेमन्त राना, सुष्मा कार्की र नायक अनुप विक्रम शाहीले बुधबार लन्डनस्थित नेपाली दूतावासमा न्यानो आतिथ्य पाएका छन् । सिद्धार्थविक्रम क्षेत्रीका साथ दूतावास गएका कलाकारहरुले नेपालको संविधान तथा राष्ट्रिय दिवसमा आयोजित विशेष समारोहमा सहभागिता जनाउंदै दूतावास भवन अवलोकन समेत गरे । नेपाली राजदूत डा. दुर्गाबहादुर सुवेदी लगायत दूतावास कर्मचारीले कलाकारहरुको स्वागत गरेका थिए । राजदूत सुवेदी कलाकारहरुलाई ‘राष्ट्रको गहना’ ठान्छन् ।
कलाकारहरुको बेलायत तथा अन्य देशका कूटनीतिज्ञ र स्थानीय मेयरहरुसंग भलाकुसारी समेत भएको थियो ।
