मिडल्याण्डवासी नेपाली एनआरएनए यूके निर्वाचनको ‘हट डिवेट’ मा

 

लन्डन । मिडल्याण्डवासी नेपालीलाई आसन्न एनआरएनए यूके निर्वाचनले छोएको छ । सेप्टेम्बर ९ मा हुने निर्वाचनका लागि निर्णायक मानिएको मिडल्याण्ड क्षेत्रमा मतदाताहरुसंग मत माग्न उम्मेदवारहरुको व्यस्तता जारी छ ।

यसै क्रममा शनिबार बर्मिङहमको वल्डबरीमा आयोजित अन्तरक्रियामा उम्मेदवारहरुले मत दिन अपिल गरे ।

पत्रकार शिव भण्डारीले सञ्चालन गरेको उक्त कार्यक्रममा उपाध्यक्षका उम्मेदवार दयानिधि सापकोटा, सहकोषाध्यक्ष उम्मेदवार सुरज पौडेल, सचिवका उम्मेदवार तारानाथ भण्डारी, सदस्यका उम्मेदवारहरु विष्णु खरेल, पवन शर्मा र कृष्ण ढकाल (कोलेश्वर) एवं एनआरएनए यूके आइसीसी सदस्यका उम्मेदवार देवराज आचार्य (चिरन) ले आ आफ्ना धारणा राख्दै मत दिन अपिल गरे । संस्थाको संरचनागत सुधारका लागि आफूहरु योग्य भएको उनीहरुको धारणा थियो ।

उपाध्यक्षका उम्मेदवार सापकोटाले सामाजिक चेतना, समाजको विकास र सफल नेतृत्व कसरी गर्न सकिन्छ भन्नेबारे सानै देखि सोच्दै आएको र २५ वर्षको अन्तरालमा विभिन्न संगठनमा आवद्ध भएको जनाउंदै संघमा समृद्ध, सफल नेतृत्वका लागि मिडल्याण्डबाट जुझारु टिम एनआरएनए यूकेमा गएको बताए ।

सृजनशील लेस्टर नेपाली समाजका पूर्व अध्यक्ष समेत रहेका सापकोटाले जल्ला बल्दा साथी पुगे संघलाई फरक ढंगले विकास गर्न सकिने विश्वास व्यक्त गरे । उनले यही सोमबार बैठक बसेर थप चुनावी रणनीति बनाउने पनि बताए ।

एनआरएनए यूके आइसीसी सदस्यका उम्मेदवार देवराज आचार्य (चिरन) ले एनआरएनए यूके निर्वाचनमा मिडल्याण्डका नेपालीले हलचल ल्याइदिएको र उनीहरुमा नेतृत्व हांक्न सक्ने क्षमता भएको बताए ।

शुभकामना मन्तव्यका क्रममा साझा नेपाली समाजका अध्यक्ष रणबहादुर केसीले नेपाल सरकारले विदेशमा राजदूतावासपछि मान्यता दिएको संस्था एनआरएन भएपनि उक्त संस्था आकाशतिर फर्केको र जमिनतिर फर्काउन नयां कार्यसमितिले काम गरोस् भन्ने शुभकामना दिए ।

एनआरएनमा राजनीतिक प्रभाव नपार्न उनले मतदाताहरुसंग आग्रह गरे । केसीले एनआरएनए यूकेमा उठेका सबै उम्मेदवार क्षमतावान भएको बताउंदै सक्षम व्यक्तिलाई जिताउन अपिल समेत गरे ।

कार्यक्रममा साझा नेपाली समाजका पूर्व अध्यक्ष राजु ढकालले संघ विगतको तुलनामा सुधारोन्मुख भएको बताए भने नटिङहम नेपाली समाजका अध्यक्ष प्रविण पाण्डे, मनकामना महिला समूहकी अध्यक्ष सिता खरेल लगायतले विभिन्न सुझाव र जिज्ञासा राखेका थिए ।

कार्यक्रमका लागि हल व्यवस्थापन भूपेन्द्र पाठकले गरेका हुन् ।

तस्विरहरुः दिनेश परियार/एक्सप्रेस स्टुडियो