कुमार श्रेष्ठ
लन्डन । पासा पुच गुठी यूकेले आगामी सेप्टेम्बर ३ मा पांचौं वृहत भेला गर्ने भएको छ । बेलायतभर छरिएर रहेका नेवारहरु आवद्ध पासा पुच गुठी समन्वय समितिले अल्डरसटमा भेला गर्न लागेको हो ।
बेलायतका नेवारहरु चार वटा शाखा अन्तर्गत संगठित भएका छन् जसमा प्लमस्टिड, लन्डन, रिडिङ र अल्डरसट शाखा छन् । विदेशमा पनि नेवारी संस्कृति, रितिरिवाजको संरक्षरण गरि नयां पुस्तालाई जानकारी गराउन हरेक २ वर्षमा भेला गरिंदै आएको छ ।
सन् २००९ सालमा अल्पर्टनबाट सुरु भएको भेला सन् २०११ मा अल्डरसट, सन् २०१३ मा प्लमस्टिड र सन् २०१५ मा रिडिङमा भइसकेका छन् ।
यसपटक लन्डनमा भेला हुने पालो भएपनि स्थान अभावका कारण अल्डरसटमा गर्नु परेको समन्वय समितिका अध्यक्ष कुमार श्रेष्ठले वीनेपालीलाई बताए । उनका अनुसार भेला अल्डरसटमा भएपनि सम्पूर्ण जिम्मा लण्डन शाखाका अध्यक्ष कपिल श्रेष्ठले लिएका छन् ।
चार वटा शाखामा बांधिएका बेलायतवासी नेवारहरुले दुई वर्ष कार्यकालभर गर्ने काम समेत बांडफांड गरेका छन् । अल्डरसट शाखाले बेलपूजा र ब्रतवन्ध जस्ता काम गर्छ । त्यस्तै, लण्डन शाखाले सेमिनार, रिडिङ शाखाले गुठी पूजा तथा प्लमस्टिड शाखाले म्हः पूजा र सांस्कृतिक सम्बन्धि काम गर्दै आएको छ ।
नेवारहरु आ आफ्नै काम, जागिर र व्यवसायमा व्यस्त रहेपनि वृहत भेलालाई पर्वका रुपमा लिंदै उत्साहजक रुपमा उपस्थित हुंदै आएका छन् ।
