कस्तुरीका हिरो गायकका रुपमा उदाए

लन्डन । ‘कस्तुरी’ फिल्मसंग नायिका करिष्मा केसी (मानन्धर) को विशेष सम्वन्ध छ । सन् १९९१ तिर लन्डनमा बनाइएको उक्त फिल्मले करिष्माको लोकप्रियतामात्र बढाएन, छायांकनका क्रममा लन्डन आउंदा विनोद मानन्धरसंग लगनगांठो नै कसियो । सामान्य परिवारकी करिष्मा एकाएक सम्पन्न 
परिवारमा भित्रिइन् । त्यही फिल्म ‘कस्तुरी’ का मेन हिरो अजय शेखर प्रधान गायकका रुपमा उदाएका छन् । उनको आफ्नै शब्द, संगीत र स्वर रहेको ‘लज्जालु आंखाले नहेर…’ गीतको म्यूजिक भिडियो तीन दिन अघि बाबुको मुख 
हेर्ने दिन रिलिज गरिएको छ ।

प्रेमसंग सम्वन्धित उक्त आधुनिक गीतबाट राम्रो प्रतिक्रिया आएको प्रधानले बताए ।

लन्डनमा छायांकन गरिएको उक्त म्यूजिक भिडियोका एरेन्जर हुन् बाबुल गिरी । म्यूजिक भिडियोमा सुरेश श्रेष्ठ र रश्मी गौतमले अभिनय गरेका छन् भने निर्देशन प्रधान र सुरेश श्रेष्ठको छ ।

विगत २९ वर्षदेखि बेलायत बस्दै आएका प्रधानले दश वर्षअघिसम्म स्टेज कार्यक्रमहरुमा खुबै गाउंथे । एक दशकको ‘ग्याप’ पछि प्रधानले पहिलो गीत रेकर्ड तथा भिडियो सार्वजनिक गरेका हुन् । समय मिलेसम्म गायनलाई निरन्तरता दिने उनको सोच छ ।

प्रधानको नाता अभिनयसंग बढि गांसिएको छ । नेपालको पहिलो भिडियो फिल्म ‘प्रयास’ सहित, विभिन्न नाटक, टिभी सिरियल ‘घर संसार’ र चलचित्र ‘आदर्श नारी’ मा समेत अभिनय गरेका उनी अभिनित ‘समुद्रपारीको देश’ फिल्म भने सार्वजनिक हुन सकेन । उक्त फिल्म किरण प्रधानले निर्देशन गरेका थिए भने राजेश हमाल, सविता लामा आदिको अभिनय थियो ।

हेर्नुहोस् उनको भिडियोः