जहिले रिसाउने साईंली अब बेलायतका दर्शकमाझ

 

लन्डन । निर जहिले रिसाउने…होस् वा पारी त्यो डांडामा हेर…। अनि लैजाउ घुमाउन मलाई ठमेल बजार… जस्ता गीत नसुन्ने/नहेर्ने दर्शक श्रोता कमै होलान् । यिनै गीतका सर्जक संगीतकार तथा नेपाल आइडलका निर्णायक कालिप्रसाद बास्कोटा, सुन साईंली साईंली परदेशबाट म आउंला…गीत गाउने गायक हेमन्त राना अनि ‘हट एण्ड बोल्ड’ मोडल सुष्मा कार्की बेलायत आउने भएका छन् ।

सेप्टेम्बर दोश्रो साता दशैं धमाका गर्न उनीहरुले बेलायतको भिजा लिइसकेका छन् । श्री सिद्धार्थ एवं नेपलिज इन्टरटेन्मेन्ट ग्रुपको आयोजना र नेपालीपत्रको सहकार्यमा बेलायतका विभिन्न शहरमा हुन लागेको ‘दशैं धमाका’ मा कलाकारले आफ्नो कला प्रस्तुत 
गर्ने तयारी छ ।

सेप्टेम्बर दोश्रो हप्ता बेलायत टेक्ने कलाकारहरुले अल्डरटस्थित एम्पायर हलमा सेप्टेम्बर १५ सांझ कार्यक्रम गर्नेछन् भने १७ सेप्टेम्बरमा लन्डन हयारो बरो फुटबल क्लव, २३ मा रेडिङस्थित किन्की कोला र २४ सेप्टेम्बरमा प्लमस्टिडमा कार्यक्रम गर्ने तय भइसकेको छ ।

सोही समूहले ति कलाकारका साथ नेपालका बाढीपीडितको सहयोगार्थ ‘माया पव’ मा एक च्यारिटी नाइट गर्ने भएको छ । च्यारिटी र अन्य सबै शोको शुल्क १५ पाउण्ड राखिएको छ । बाढी पीडितका लागि संकलन हुने रकम नेपाली दूतावासमार्फत पठाइने आयोजक सिद्धार्थ विक्रम क्षेत्रीले जनाए ।

तीन जना कलाकार अहिले नेपालमा प्रसिद्धीको शिखरमा छन् । आयोजकले कार्यक्रममा आएर दशैं पर्व रमाइलोसंग मनाउन अपिल गरेका छन् ।