बाढी पीडितको सहायता सम्वन्धमा लन्डन दूतावासमा छलफल

लन्डन । नेपालमा हालै गएको बाढी, पहिरो र डुबान पीडित परिवारजनलाई राहत उपलव्ध गराउने सम्वन्धमा लन्डनस्थित नेपाली दूतावासमा शनिबार दिउसो छलफल भएको छ ।

राजदूत डा. दुर्गाबहादुर सुवेदीले डाकेको उक्त आकष्मिक बैठकमा उल्लेख्य उपस्थिति नभएपनि सहभागी संघसंस्थाका प्रतिनिधिले आवश्यक सहयोग गर्ने प्रतिवद्धता व्यक्त गरेका छन् ।

उक्त अवसरमा राजदूत सुवेदीले पीडितहरुलाई बेलायतका नेपालीबाट भइरहेको स्वतस्फूर्त र स्वेच्छिक सहयोगप्रति आभार व्यक्त गरेका थिए । बैठकमा राजदूतले प्राकृतिक विपत्तिमा नेपाल सरकारबाट जारी राहत, खोज र उद्दार कार्यबारे प्रकाश समेत पारे ।

बैठकमा सहयोग गर्न इच्छुकले प्रधानमन्त्री दैवी प्रकोप उद्दार कोषमा संलग्न सूची बमोजिमका बैंकहरुमा सिधै रकम जम्मा गर्न तथा वस्तुगत सहयोग समेत उपलव्ध गराउन सकिनेबारे अवगत गराइएको थियो ।

बैठकपछि बाढी तथा पहिरो पीडित परिवारहरुलाई बेलायतका विभिन्न संघसंस्था र समाजबाट प्राप्त हुने सहायता सम्वन्धमा आवश्यक समन्वय गर्ने कामका लागि दूतावासका उपनियोग प्रमुख शरदराज आरणलाई संयोजक तोकिइएको दूतावासले जनाएको छ ।