मृत्युसंग लडिरहेका साहित्यकार श्रेष्ठ अक्सिजनको सिलिण्डरमै सम्मानित भए

लन्डन । प्रवासी नेपाली साहित्य समाज बेलायत (प्रभात) ले क्यान्सर पीडित वरिष्ठ सहित्यकार डा. कविताराम श्रेष्ठलाई एक कार्यक्रमबीच सम्मान गरेको छ । श्रेष्ठलाई गत १३ अगष्ट २०१७ का दिन यूकेको वेब्रीजमा सम्मान गरिएको हो ।

राजदूत डा. दुर्गा बहादुर सुवेदीले सम्मान पत्र हस्तान्तरण 
गर्दै साहित्यकार श्रेष्ठले नेपाली साहित्यको क्षेत्रमा दिएको योगदान नेपाली साहित्य जगतले सधैं स्मरण गरिरहने बताए । सुवेदीले श्रेष्ठको नयां पुस्तक ‘लाइट अफ दि हिमालय’ को विमोचन पनि गरे ।

नयां कृतिबारे राजेन्द्र क्षेत्री, रुपक श्रेष्ठ, एलिजावेथ इभान र मुलिवीर राईले समिक्षा गरे भने साहित्यकार श्रेष्ठबारे मुलीविर राईद्वारा निर्मित ‘डकुमेन्ट्री’ प्रर्दशन गरिएको थियो ।

श्रेष्ठका ३७ वटा पुस्तकसहित दुई डकुमेन्ट्री 
सार्वजनिक भइसकेका छन् । उनले ‘भिजिटिङ’ प्रध्यापकका रुपमा मात्र नभइ अधिकांश समय साहित्य क्षेत्रमा बिताएका छन् । श्रेष्ठ विगत एकदशक देखि यूकेको वकिङमा छन् ।

श्रेष्ठले सम्मान तथा विमोचन कार्यक्रम गरिदिएकोमा सधैं ऋणी भएको विचार व्यक्त गर्दै विमोचित पुस्तक आफ्नो अन्तिम कृति भएको बताए । चिकित्सकले मिति दिएपनि आफूलाई मृत्युसंग डर नभएको र मृत्युचाहिं आफूसंग हारिरहेको बताए । ७० वर्षीय श्रेष्ठलाई अक्सिजनको सिलिण्डर सहित कार्यक्रममा सहभागी गराइएको थियो । श्रेष्ठलाई साहित्य समाजले सन् २००८ मा पनि पहिलो पटक सम्मान गरेको थियो ।

केही महिना अघि नै मृत्युको मिति पाएका श्रेष्ठको सम्मान तथा विमोचन समारोहमा भगवान चाम्लिङले स्वागत गरेका थिए भने सुश्री केवा राईले कार्यक्रम सञ्चालन गरेकी थिइन् । कार्यक्रमको सभापतित्व साहित्य समाजका पूर्व अध्यक्ष तथा विश्व नेपाली साहित्य महासंघका केन्द्रीय अध्यक्ष विश्वास दीप तिगेलाले गरेका थिए । सम्पूर्ण कार्यक्रम अंग्रेजीमा सञ्चालन भएको थियो ।