हेल्प नेपालद्वारा बाढी पीडितलाई सहयोग आह्वान

लन्डन । गत साता भारी वर्षातका कारण नेपालमा आएको बाढीबाट प्रभावित समुदायसम्म सहयोग पुराउने उद्देश्यले हेल्पनेपाल नेटवर्क युकेले सहयोग संकलन शुरु गरेको छ ।

यो लिङ्कमा गएर सक्दो सहयोग प्रदान गर्न हेल्प नेपालले अनुरोध गरेको छ।

https://www.justgiving.com/fundraising/nepal-flood-relief-2017

‘जहाँ बसे वा काम गरिरहेको भएपनि नेपालमा प्राकृतिक विपदले धनजनको ठूलो क्षति गर्दा हामीहरुको मन दुख्छ । बाढी पीडितहरुकालागि तत्काल खानेकुरा, सफा पिउने पानी र औषधिको आवश्यकता छ।  त्यसैले विगतमा जस्तै यसपटक पनि हामीले शुरु गरेको राहत अभियानमा मन खोलेर सहयोग गर्न हामी अपील गर्दछौं’, हेल्पनेपाल नेटवर्क युकेका अध्यक्ष डा. प्रणव ज्ञवालीले भने।

काठमाडौंस्थित हेल्पनेपाल नेटवर्कका अध्यक्ष अरुणसिं बस्नेतले विभिन्न ठाउँहरुबाट राहत सहयोगका लागि अनुरोधहरु आइरहेको बताए। ‘हामीले अहिले नवलपरासी, रौतहट, सिराहा, सप्तरी, झापा र सुनसरीमा राहत पुर्याउने निर्णय गरेका छौँ। यो मानवीय अभियानमा सहयोग गर्न हामी नेपाल र संसारभरि रहनुभएका नेपालीहरुलाई आह्वान गर्दछौं’,उनले भने।

हेल्प नेपाल नेटवर्कले विगतमा पनि भूकम्प तथा बाढी, पहिरो एवम् आगलागी पीडितहरुलाई थलोमै गएर राहत वितरण गर्दै आएको छ। गत जुलाईमा पनि नेटवर्कले सप्तरीमा बाढी पीडित दर्जनौं परिवारलाई भाँडाकुँडा, धोती-साडी, त्रिपाल र लुगाहरू वितरण गरेको थियो।

हेल्प नेपाल मार्फत प्रदान गरिएको सबै सहयोग सिधै पीडित परिवार सम्म पुग्ने र एक पैसा पनि प्रशासनिक काममा खर्च नहुने नेटर्कले जनाएको छ। सन् १९९९ मा स्थापना गरिएको कल्याणकारी संस्था हेल्प नेपाल नेटवर्कका १४  मुलुकमा शाखा छन्।