तीज कार्यक्रममा महिलाहरुलाई नचायो सपन इन्टरटेन्मेन्टले

लन्डन । सपन इन्टरटेन्मेन्ट लि. ले आइतबार तीज कार्यक्रम गरेको छ । आइतबार अल्डरसटस्थित द प्यालेस हलमा कार्यक्रम भएको हो ।

कार्यक्रममा रातो पहिरन र गरगहनामा सजिएका महिलाहरुले नाचगान र दर खाएर रमाइलो गरे ।

करिब दुई सय महिला सहभागी कार्यक्रममा प्रमुख अतिथी थिइन् राजदूत पत्नी पुनम राज्य लक्ष्मी सुवेदी । उनले शुभकामना मन्तव्य दिंदै प्रवासमा भएपनि नेपालीले आफ्नो भाषा, धर्म, संस्कार, संस्कृति, चाड पर्व र परम्परालाई नबिर्सिएको र बिर्सन पनि नहुने बताइन् ।

‘नेपाली नारीहरुको महान पर्व तीजमा हामी वर्षभरिका दुःख, पीर, कष्ट, आंसु बेदना बिसेर नाच्छौं’, उनले भनिन्, ‘यो आपसमा मित्रता, सहिष्णुता, सहयोग अभिवृद्धि र एकता बढाउने माध्यम पनि हो ।’

श्रीमति सुवेदीले आगामी २० अगष्ट आइतबार दूतावासमा तीज कार्यक्रम राखिएको जनाउंदै सबै महिलालाई निम्तो समेत दिएकी थिइन् ।

सपन इन्टरटेन्मेन्टले विगत १६ वर्षदेखि हरेक वर्ष तीज कार्यक्रम गर्दै आएको छ । बेलायतमा अत्यधिक कार्यक्रम भएपछि गत वर्ष भने स्थगित गरिएको थियो । तर, दिदीबहिनीले कार्यक्रम गर्न कर गरेपछि यस वर्ष तीज मनाइएको सपन इन्टरटेन्मेन्ट लि. का सपनकुमार राईले बताए ।