‘बिजनेश क्लास’ टिकट नपाएपछि भुवन बाबु छोराले रद्द गरे बेलायत भ्रमण


लन्डन । बिजनेश क्लास टिकट नपाएको बहानामा अभिनेता भुवन केसी र उनका छोरा नायक अनमोल केसीले बेलायतमा हुन लागेको अवार्डस कार्यक्रम रद्द गरिदिएका छन् । भिसा लिएर दशौं नेपाली फिल्म फेयर अवार्डस कार्यक्रमका लागि उड्ने बेला भुवनले आफूहरु बिजनेश क्लास टिकट भए मात्र यात्रा गर्ने जिद्दी गरेका थिए । तर, आयोजकले महंगो टिकट खरिद गर्न नसक्ने बताए लगत्तै भुवन बाबु छोराले यात्रा रद्द गरेको आयोजक थर्ड आइका विकास देवकोटाले जनाए ।

‘नेपालबाट आउने तीस भन्दा बढि कलाकार सबै इकोनोमिक क्लासमा आएका बेला हामीले उनीहरु दुई जनालाई मात्र विजनेश क्लास अफर गर्न चाहेनौं’, देवकोटाले भने, ‘नेपाली फिल्म प्रवर्धनका लागि सात समुद्रपार गर्न लागिएको कार्यक्रममा सपोर्ट गर्नुको सट्टा भुवनजीले टिकटको बहानामा जुन हर्कत देखाउनुभयो हामी ज्यादै असन्तुष्ट छौं ।’

भुवनले आफ्नी पूर्व श्रीमति सुस्मिता केसीलाई बेलायत झिकाए आफूहरु नजाने बार्गेनिंग समेत गरेको देवकोटाले बताए । यसअघि आयोजक सुस्मितालाई बेलायत झिकाउने पक्षमा थियो ।

आज १ जुलाई सांझ ६ बजेदेखि अल्डरसटको एम्पायर हलमा अवार्डस कार्यक्रम हुंदैछ । उक्त कार्यक्रमकै लागि नेपालबाट कलाकारहरु करिष्मा मानन्धर, आर्यन सिग्देल, अनुप विक्रम शाही, केकी अधिकारी, अशिष्मा नकर्मी, वर्षा सिवाकोटी, सुरबीना कार्की, नम्रता योगी, सलोन बस्नेत, गायिका सन्जिवनी, गायक आनन्द कार्की, संगीतकार शिखर सन्तोष, प्रदीप उदय, पुस्कर लामा, रामकेशर बोगटी, ज्ञानेन्द्र देउजा, सुन्दरलाल श्रेष्ठ, कुशल थापा आदि गरि तीस भन्दा बढि कलाकार – प्राविधिक बेलायत आइसकेका छन् ।

प्रतिक्रिया

सम्बन्धित सामाग्री