मंगलबार, जेठ ४ २०७८ | Tue, May 18, 2021
नेपालको समय: ०१:०१ | UK Time: 20:16

एडिनबरामा १० औं अन्तर्राष्ट्रिय सगरमाथा दिवस

वीनेपाली
२०७४ जेठ १७ गते ०:४५

लन्डन । स्कटल्याण्डको एडिनबरामा १० औं अन्तर्राष्ट्रिय सगरमाथा दिवस मनाइएको छ । सन् १९५३ मा तेन्जिङ नोर्गे शेर्पा र एडमन्ड हिलारीले पहिलोपटक सगरमाथाको सफल आरोहण गरेको दिन २९ मेलाई अन्तर्राष्ट्रिय सगरमाथा दिवसका रुपमा मनाइन्छ ।

कार्यक्रममा सगरमाथा र नेपालको पर्वतारोहण तथा पदयात्राका विविध पक्षबारे चर्चा गर्दै दिवस मनाइएको हो ।

नेपालमा यस दिवस पारेर हिमालय पर्यटन प्रवर्धनका विभिन्न गतिविधि आयोजना गरिन्छ ।

कार्यक्रममा नेपाल पर्यटन बोर्ड यूके प्रतिनिधि पशुपति भण्डारीले नेपालको पर्यटनबारे जानकारी दिंदै सहभागीलाई नेपाल घुम्न जान आग्रह गरे । उक्त अवसरमा नेपालको संस्कृति झल्कने भिडियो समेत देखाइयो । दुई चर्चित पर्वतारोही जेम्स ओगिल्भी र दावा शेर्पाले नेपालको पर्वतारोहण र पदयात्राबारे बोले । ७ वटा हिमशिखरको सफल आरोहण गरिसकेका बेलायती नागरिक जेम्स सामाजिक कार्यकर्ता पनि हुन् भने शेर्पाले दुई पटक सगरमाथा आरोहण गरेका छन् ।

६० भन्दा बढि सहभागी उक्त कार्यक्रममा ८ वर्षीया अबिसा चापागाईं र चरण प्रधानको नाचमा सहभागी खुबै रमाए । इरान र हल्याण्ड नागरिकले सांगीतिक मनोरन्जन प्रदान गरे ।

उक्त कार्यक्रम स्कटल्याण्डस्थित नेपाली समुदाय र नेपाल पर्यटन बोर्डले भिजिट नेपाल युरोप २०१७ अभियानका रुपमा मनाएका हुन् । भिजिट नेपाल युरोप २०१७ अभियानको मुख्य उद्देश्य युरोपेली पर्यटकलाई नेपाल बिदा मनाउन सुन्दर गन्तव्य हो भन्ने सन्देश दिनु रहेको छ । नेपाल पर्यटन बोर्डले गत वर्ष भन्दा करिब ४० प्रतिशत बढि युरोपेली पर्यटक नेपाल भित्रयाउने लक्ष्यसहित अभियान तीव्र पारेको छ । सन् २०१६ मा एक लाख ७० हजार भन्दा बढि पर्यटक 
युरोपबाट नेपाल घुम्न गएका थिए ।

पर्यटन बोर्ड प्रतिनिधि भण्डारीले कार्यक्रम सम्पन्न गर्न सहयोग गर्ने सबै र सहभागीप्रति आभार व्यक्त गरेका छन् ।

 

प्रतिक्रिया

सम्बन्धित सामाग्री

फेसबुक