मंगलबार, असोज ६ २०७७ | Tue, September 22, 2020
नेपालको समय: १३:४९ | UK Time: 09:04

योजनाबद्ध तरिकाले भरतपुरमा मतपत्र च्यातियो– ओली

वीनेपाली
२०७४ जेठ १६ गते २०:०३

काठमाडौँ महानगरपालिकाको प्रमुखमा विद्यासुन्दर शाक्य निर्वाचित भएपछि नेकपा (एमाले)द्वारा राजधानीमा मङ्गलबार आयोजित विजयी सभालाई सम्बोधन गर्दै अध्यक्ष केपी शर्मा ओली । तस्बिर ः प्रदीपराज वन्त, रासस

काठमाडौँ, १६ जेठ । नेकपा (एमाले)का अध्यक्ष केपी शर्मा ओलीले भरतपुर महानगरपालिकामा योजनाबद्ध तरिकाले मतपत्र च्यातिएको आरोप लगाउनुभएको छ ।

नेकपा (एमाले) काठमाडौँ जिल्ला कमिटीले आयोजना गरेको काठमाडौँबाट स्थानीय तहमा विजयी उम्मेदवारहरुको विजयी सभालाई आज भृकुटीमण्डपमा सम्वोद्धन गर्दै उहाँले सो आरोप लगाउनुभएको हो ।

अध्यक्ष ओलीले भन्नुभयो, “आफूले हार्ने भएपछि योजनाबद्ध रुपमा वाइसिएल लगाएर मतपत्र च्यातिएको हो, त्यहाँ फेरि निर्वाचन गराउन सम्भव छैन ।”

मुस्लिम धर्मावलम्बीको इदउल–फित्र पर्वका अवसरमा आगामी असार ९ गते हुने भनिएको स्थानीय तहको दोस्रो चरणको निर्वाचन एमालेलाई मान्य नहुने उल्लेख गर्दै उहाँले “विशेष पर्व, बर्खाको समय, मतदाता कसरी मतदानस्थलसम्म जाने ? पानीमा मतपत्रको सुरक्षा कसरी गर्ने ? भनी प्रश्न गर्नुभयो । ”

अध्यक्ष ओलीले एमालेलाई सरकारको हतारो नभएको र तीन वटै निकायको निर्वाचन सम्पन्न भएपछि मात्र यसवारे सोच्न सक्ने बताउँदै सरकारले प्रदान गर्ने तक्मा र विभूषणलाई पनि अपमान गर्ने कार्य गरेको आरोप लगाउनुभयो ।

नेपालको इतिहासमा पहिलो महिला प्रधानन्यायाधीश सुशीला कार्कीमाथि महाअभियोग लगाएर अवकाश लिनुपर्ने अवस्थाको सिर्जना गर्नु ज्यादै दुःखद कुरा हो, उहाँले भन्नुभयो ।

अध्यक्ष ओलीले काठमाडौँ महानगरपालिकामा राम्रो काम गर्ने समूह आएको र यसले पाँच वर्षसम्म भ्रष्टाचारको छिटासमेत नलाग्ने गरी सिङ्गो महानगरको विकास र समृद्धिका लागि काम गर्नुपर्नेमा जोड दिनुभयो ।

काठमाडौँ महानगरपालिकाका प्रमुख विद्यासुन्दर शाक्यले आफूले निर्वाचन जितेपछि ठूलो जिम्मेवारी महसुस भएको उल्लेख गर्दै आफूले मतदाताको विश्वास नगुमाउने गरी काम गर्ने प्रतिबद्धता व्यक्त गर्नुभयो ।

बोल्ने बेला नभई काम गरेर देखाउने बेला भएको भन्दै उहाँले काठमाडौँलाई हेर्न मात्र हैन, बस्न लायक सुन्दर सहर बनाउने सङ्ल्कप गर्नुभयो ।

यसअघि बाजागाजासहित काठमाडौँको न्युरोडगेटबाट सुरु भएको विजय रयाली रत्नपार्क हुँदै भृकुटीमण्डपमा आएर विजयसभामा परिणत भयो ।

प्रतिक्रिया

सम्बन्धित सामाग्री

फेसबुक