लन्डन । नेपालका विभिन्न स्थानमा सामाजिक सेवा, मानव हित र शिक्षाको उज्यालो दिप जगाउदै हिँडेका सामाजिक अभियन्ता लक्ष्मी प्रतिष्ठान नेपालका अध्यक्ष बिष्णु गौतम मे १९ मा बेलायत आउने भएका छन् ।
गौतम बेलायतमा सामाजिक, मानवीयलगायत सांस्कृतिक क्षेत्रमा सहयोग र अग्रणी भूमिका खेल्दै आएको च्यारिटी संस्था नेपलिज ब्रिटिश कम्युनिटी यूके (एनबिसी यूके) को निमन्त्रणामा बेलायत आउन लागेका कम्युनिटी अध्यक्ष मिलन घिमिरेले जानकारी दिए ।
गौतम २१ मेमा नेपाल पत्रकार महासंघ बेलायतको च्यारिटी कार्यक्रममा सहभागी हुने र सो पश्चात २२ देखि २६ मेसम्म स्कटल्याण्डको कार्यक्रममा सहभागी हुनेछन् ।
२७ मे शनिबार दिउसो एनबिसी यूकेले साउथ हयारोस्थित गोल्डनसिप रेस्टुरेन्टमा विष्णु गौतमसंग अन्तरंग गर्न लागेको छ । सो कार्यक्रममा बेलायतका नेपाली संघ संस्था, सामाजिक तथा वौद्धिक व्यक्तित्व, व्यापारी, उद्योग व्यबसायी, पत्रकार, कलाकार तथा समाजका सबै क्षेत्रसंग सम्वन्धित व्यक्तिलाई उपस्थित हुन अनुरोध तथा निमन्त्रणा गरिएको छ ।
परिवारमा परेको अकल्पनीय बज्रपात अनि त्यसले ल्याउन खोजेको मानसिक बिक्षिप्तता र पारिवारिक तहसनहसलाई दृढ मनोवलका साथ किनारा लगाउदै सामाजिक सेवाबाट समाज परिवर्तन, मानव कल्याण, पिछडिएका सिमान्तकृत वर्गको सेवामा समर्पित छन् गौतम । दीन दुःखीहरूको सेवामा देशका विकट कुना कन्दराहरूमा शिक्षा, स्वास्थ्य, खानेपानी लगायत काम गर्दै दिनरात खटिइरहने गौतम देश तथा विदेशमा अत्यन्तै परिचित छन् ।
गौतमले सञ्चालन गरेको लक्ष्मी प्रतिष्ठानले चितवन र काभ्रे जिल्लामा थुप्रै सामाजिक र मानवीय काम गरिसकेको छ । प्रतिष्ठानले विद्यालयलाई जग्गा दान, विद्यालय तथा छात्रावास निर्माण, पुस्तकालय निर्माण, खानेपानी तथा शौचालय व्यवस्था, भूकम्प पीडितलाई बास, भोका नांगाहरूलाई गास अनि कपास, जीविकोपार्जनका लागि उध्यमशील कार्यक्रम सञ्चालन गरेको छ ।
स्मरण रहोस् एनबिसी यूकेले प्रतिष्ठानलाई सहयोग गरी ९ लाख २३ हजार रूपैयाँमा चितवन कान्दामा दुई तले छात्रावास निर्माण गरेको छ ।
विभिन्न क्षेत्रमा निश्वार्थ भावनाका साथ काम गरेका गौतमबाट प्रभावित भएर बेलायत, अमेरिका लगायत विश्वका अधिकांश ठाउँबाट व्यक्ति तथा संघ संस्थाले सहयोग र चन्दा दिनुका साथै प्रतिष्ठानको सदस्यस्ता लिएका छन् ।
