मंगलबार, जेठ ४ २०७८ | Tue, May 18, 2021
नेपालको समय: ००:४९ | UK Time: 20:04

चटारोका साथ घरदैलो कार्यक्रममा उम्मेदवार

वीनेपाली
२०७४ वैशाख २४ गते १:४३

मध्यपुर थिमि नगरपालिकामा नेपाली काँग्रेसबाट मेयरका उम्मेदवार अष्ट कवे र उपमेयर अन्जना मढीकर्मी सानोठिमीको मगरगाउँमा शनिबार घरदैलो अभियानमा भोट माग्दै । तस्बिर ः रमेश गिरी, भक्तपुर, रासस

काठमाडौँ, २३ वैशाख । पहिलो चरणमा निर्वाचन हुने मुलुकका २८३ स्थानीय तहमा निर्वाचनको प्रचारप्रसार शान्तिपूर्ण र निकै उत्साहपूर्ण ढङ्गबाट सुरु भएको छ ।

निर्वाचन आयोगबाट शुक्रबार चुनाव चिह्न प्राप्त गरेपछि मतदातालाई आफ्नो पकडमा पार्न प्रचारप्रसारका सामग्रीसहित आमसभाका अतिरिक्त उम्मेदवारबाट घरदैलो कार्यक्रम सुरु गरिएको छ ।

पहिलो चरणको निर्वाचन ३, ४ र ६ नं प्रदेशका ३४ जिल्लामा यही वैशाख ३१ गते आइतबार बिहान ७ बजेदेखि अपराह्न ५ बजेसम्म हँुदैछ ।

सधैँजसो राजधानी र जिल्ला सदरमुकाममा रहने अधिकांश पार्टीका नेताहरु अहिले निर्वाचनको प्रचारप्रसारका लागि लामो समयपछि स्थानीय तहका वडा-वडामा पुगिसकेका छन् ।

निर्वाचनको प्रचारप्रसारको समय छोटो भएकाले खासगरी सडक सञ्जाल नपुगेका पहाडी तथा हिमाली क्षेत्रका उम्मेदवारलाई अहिले निकै चापाचाप भएको छ ।

सुगम क्षेत्रका उम्मेदवार भने पार्टीको झन्डा र उम्मेदवारको तस्बिर अङ्कित चुनावी पोस्टर सवारी साधनमा टाँगेर दलबलसहित बिहानदेखि नै प्रचारमा जुटेको देखिएको छ ।

ठूलो आकारको मतपत्र भएका कारण भोट कसरी हाल्ने भन्ने पाटोमा मतदातालाई आवश्यक शिक्षा पुरयाउने विषय निकै चुनौती रहेको उम्मेदवारबाट गुनासो सुनिएको छ ।

निर्वाचन आयोगले निर्वाचनमा खटिएका कर्मचारी, राजनीतिक दल, नागरिक समाज र सञ्चारमाध्यमलाई मतदातालाई निर्वाचनमा सहभागी हुन र आचारसंहिता पालनाको सन्देश गाउँगाउँमा पुरयाउन पटकपटक आग्रह गर्दै आएको छ ।

निर्वाचन आयोगबाट अनुगमनका लागि कालीकोट खटिनुभएकी सहसचिव इन्दिरा दाहालले शिक्षामा पछि परेको तथा भौगोलिक विकटता भए पनि निर्वाचन आचारसंहिताको परिधिभित्र रहेरै उम्मेदवारले एकाएक निर्वाचनको राम्रो वातावरण बनाएको प्रतिक्रिया दिनुभयो ।

हिमालपारिको जिल्लाका रुपमा परिचित डोल्पा पुग्नुभएका सहसचिव देवराज ढकालले शान्तिपूर्ण र उत्साहपूर्वक रुपमा प्रचारप्रसारमा जुट्दै आफ्नो पकड बलियो बनाउन उम्मेदवारहरु निकै हतारोमा घरदैलो कार्यक्रममा रहेको जानकारी दिनुभयो ।

सिन्धुलीका लागि खटिनुभएका सहसचिव भक्कप्रसाद आचार्यले जिल्लामा उपलब्ध साधन स्रोतको उपयोग गर्दै निर्वाचनको तयारीलाई अघि बढाइएको जानकारी दिँदै कर्मचारी परिचालन र शान्ति सुरक्षाको अवस्था राम्रो रहेको प्रतिक्रिया दिनुभयो । पहिलो चरणको निर्वाचनबाट १३ हजार ५५६ जनप्रतिनिधिको चयन हुनेछ । सिन्धुलीमा तीन दिनदेखि पटकपटक ठूलो पानी परेकाले प्रचारप्रसारको काममा उम्मेदवारलाई केही कठिनाइ पहिलो चरणको निर्वाचनमा ४९ लाख ५६ हजार ९२५ जना मतदातालाई मतदान गर्नेछन् भने त्यसका लागि मतदान केन्द्र छ हजार ६४२ कायम गरिएको छ ।

जुम्लामा रहनुभएका सहसचिव कृष्णजीवी घिमिरेले मतदाता, उम्मेदवार र मतदान अधिकृतमा देखिएको उत्साह र निर्वाचन गर्नैपर्छ भन्ने दृढ सङ्कल्पले निर्वाचनको वातावरण सौहार्द बनेको प्रतिक्रिया दिनुभयो ।

म्याग्दीमा रहनुभएका सहसचिव महेन्द्र गुरागाइंले राजनीतिक दलका उम्मेदवारबाट एक अर्कामा आरोप प्रत्यारोप गर्ने तथा आचारसंहिता उल्लङ्घन गरेको भन्नेजस्ता हालसम्म कुनै पनि गुनासो जनाउँदै शान्तिपूर्ण रुपमै उम्मेदवार प्रचारप्रसारमा जुटेका छन् भन्नुभयो ।

बीस वर्षपछि हुन लागेको निर्वाचनको महाअभियानको माहोल बनाउँदै मतदातालाई आफ्नो पक्षमा ल्याउने दौडधुप र चटारोमा उम्मेदवारको दिनचर्या बितेको छ ।

प्रतिक्रिया

सम्बन्धित सामाग्री

फेसबुक