लन्डन । गोर्खा अनलाइन रेडियोले आइतबार लन्डनस्थित फेल्थाममा नयां वर्ष शुभकामना सांझ तथा सांस्कृतिक कार्यक्रम गरेको छ । कार्यक्रममा बेलायतस्थित नेपाली सञ्चारकर्मी र सर्वसाधारणबाहेक अरु संघसंस्थाका प्रतिनिधिलाई निमन्त्रणा गरिएको थिएन ।
कार्यक्रममा दर्जन बढि सञ्चारकर्मी र सर्वसाधारण भेला भएर नयां वर्ष मनाए । कार्यक्रम उद्घाटन बेलायतका लागि नेपाली राजदूत डा. दुर्गाबहादुर सुवेदीले पानसमा बत्ती बालेर गरेका थिए । डा. सुवेदीले नयां वर्ष २०७४ को शुभकामना मन्तव्यमा नेपाली वर्ष मनाउन अब नेपाल जान नपर्ने बताए । उनले विदेशमा नेपाली कला संस्कृति मौलाउंदै आएको बताउंदै नयां वर्षले खुशीसहित नयां सम्भावना बोकेर आउने बताए । उनले यस्ता उत्सवले नेपालीबीच एकता, सहिष्णुता र भातृत्व विकास हुने विश्वास समेत व्यक्त गरे ।
कार्यक्रममा गोर्खा रेडियोका निर्देशक नरेन्द्र बस्नेतले स्वागत मन्तव्य दिएका थिए । कार्यक्रममा स्थानीय कलाकारले विविध सांस्कृतिक कार्यक्रम प्रस्तुत गरे । उक्त अवसरमा गायक सुजन पराजुली, दिव्यानी शर्मा, सुजाता काफ्ले, चांद लामा लगायतले आफ्नो गायन प्रस्तुत गरेका थिए ।
कार्यक्रममा रश्मी गौतम, टिया आचार्य, बेन्सन बस्नेत, श्रेया क्षेत्री, अमुल्य थापा, अतुल्य शाही, मन्दिरा प्रसाई, सहज बानियां लगायतले नृत्य प्रस्तुत गरेका थिए । कार्यक्रममा साहित्यकार नारायण गाउंले, रामशरण सिम्खडाले गजल र बिमला गौतमले कविता वाचन गरे । सोही अवसरमा पूर्व डिएसपी वाचस्पति रेग्मीको सम्पादनमा सुरु भएको शितलपाटी डट कम समाचार पोर्टलको राजदूत डा. सुवेदी र नेपाल पत्रकार महासंघ यूके अध्यक्ष नरेश खपाङ्गीले उद्घाटन गरे ।
कार्यक्रममा नेपाल पत्रकार महासंघ यूकेका पूर्व अध्यक्ष चिरन शर्मा, काउन्सिलर विष्णु गुरुङ, विश्व हिन्दू महासंघ बेलायतका अध्यक्ष पण्डित चिरञ्जीवी ढकाल, समाजसेवी ध्रुव केसी, सोलिसिटर राजु थापा लगायतको उपस्थिति थियो ।
