आइतबार, कार्तिक १६ २०७७ | Sun, November 01, 2020
नेपालको समय: ०७:२६ | UK Time: 01:41

एभरेष्ट कपको तयारीमा जुटयो सहारा यूके

वीनेपाली
२०७३ चैत २२ गते १:३५

लन्डन । सहारा यूके आगामी १३ मे शनिबार लन्डन फेल्थाममा हुने एभरेष्ट कपको तयारीमा जुटेको छ । भेटघाट रेष्टुरेन्टमा आइतबार सम्पन्न संस्थाको बैठकले एभरेष्ट कप तयारीबारे अवगत गराउंदै अन्य महत्वपूर्ण निर्णयहरु गरेको छ ।

फेल्थाम कम्युनिटी कलेज मैदानमा हुने ९ ए साइड एभरेष्ट कपमा यसपटक २४ मेन टिमले प्रतिष्पर्धा गर्ने र अन्डर १६ का दुई टिम आमन्त्रित गरिने सहारा यूकेका अध्यक्ष मीनबहादुर गुरुङ ‘सांहिला’ ले जानकारी दिएका छन् । खेलबारे सहारा यूके डटकममा विस्तृत जानकारी उपलव्ध छ । प्रतियोगिताको संयोजन लेफ्टिनेन्ट (रिटायर्ड) कुसाङ गुरुङ र मनोज गुरुङले गरिरहेका छन् ।

बैठकमा नवनियुक्त सल्लाहकारहरुलाई औपचारिक स्वागत गरियो । बैठकले सन्डे लिग खेल निरन्तर खेलाउने, क्लब र एकेडेमीबाट खेल्ने किशोर किशोरीलाई मद्दत गर्ने र ८ देखि १४ वर्ष उमेरका युथलाई फुटबल खेल प्रशिक्षण दिने निर्णय गरेको छ । प्रशिक्षणका लागि संयोजक मनोज गुरुङ र धनु थकालीलाई जिम्मेवारी दिइएको छ ।

बैठकले सहारा यूकेको विधान बनाउन एकेन्द्र गुरुङको संयोजकत्वमा ५ जना सल्लाहकार रहने गरि एक समिति पनि गठन गरेको छ ।

बैठकमा अध्यक्ष मीनबहादुर गुरुङ ‘सांहिला’ ले हालै पोखरामा सम्पन्न आहा गोल्ड कपमा सहारा यूकेको सहभागिता र सहयोगबारे अवगत गराएका थिए । उनले सहारा एकेडेमी पोखराले बनाउन लागेको २ करोड रुपैयांको अक्षय कोषका लागि सहारा यूकेले हालसम्म २८ लाख रुपैयां संकलन गरिसकेको जानकारी दिएका थिए । उक्त अक्षय कोषका लागि बैठकमै झण्डै ८ लाख रुपैयां उठेको थियो । हालसम्म अक्षय कोषका लागि नेपालमा एक करोड २५ लाख रुपैयां संकलन भइसकेको छ ।

महासचिव कृष्ण गुरुङले सञ्चालन गरेको उक्त बैठकमा उपाध्यक्ष कुमार गुरुङले स्वागत मन्तव्य दिएका थिए ।

सहारा यूकेले खेल विकाससंगै समाजसेवालाई पनि एक साथ अगाडि बढाएको छ । उसले २१ लाख रुपैयांको बजेटमा सिन्धुपाल्चोकस्थित हैबुङ महादेवस्थान माविको ५ कोठे भवन पुर्ननिर्माण शुरु गरिसकेको छ । यसअघि उसले विभिन्न माध्यमबाट आर्थिक रकम जोहो गरि गोरखाको घैरुङस्थित ज्यामिर स्वांरामा रहेको गणेश प्रा.बि. भवन पनि पुनर्निर्माण गरिदिएको थियो ।

तस्विरः मिलन तमु

प्रतिक्रिया

सम्बन्धित सामाग्री

फेसबुक