लन्डन । समावेशी र संवैधानिक लोकतन्त्रभित्र पद्दति (सिस्टम), पारदर्शिता (ट्रान्सपरेन्सी), इमान्दारी (इन्टेग्रेटी) र उत्कृष्टता (मेरिटोक्रेसी) अर्थात स्टिमको चार खम्बामा सुसंस्कृत राजनीतिको जग निर्माण गर्ने उद्देश्यले बीबीसी नेपालीका पूर्व प्रमुख रविन्द्र मिश्रले गठन गरेको ‘साझा पार्टी’ मा बेलायतबाट पनि सहभागिता बढेको छ ।
संयुक्त अधिराज्य बेलायतमा एस के श्रेष्ठको संयोजकत्वमा साझा सद्भाव समूह निर्माण भएको हो । हालसम्म ४० जना भन्दा बढिको समूह गठन भइसकेको श्रेष्ठले जनाए । ग्रीनफोर्ड लन्डनमा शर्मिला पछाइ थापाको संयोजकत्वमा सात जनाको समूह, प्लमस्टिड लन्डनबाट अरुण शाक्यको संयोजकत्वमा ८ जनाको समूह र स्कटल्याण्डबाट पर्शुराम सिग्देलको संयोजकत्वमा ९ जनाको समूह गठन भएको छ ।
‘अब पनि हाम्रो सोचमा परिवर्तन आएन भने न त देशले राम्रो नेता पाउंछ न त देशले विकासको गति लिन्छ’, संयोजक श्रेष्ठले भने, ‘राजनीतिक संस्कारमा परिवर्तन ल्याएर देश विकास गर्न साझा पार्टी निर्विकल्प हुने मेरो विश्वास छ ।’
यसबाहेक रेडिङमा पनि महेशहरि आचार्यको संयोजकत्वमा साझा सद्भाव समूह गठन भइसकेको छ । श्रेष्ठले रेडिङ समूहसंग सहकार्य गरेर अगाडि बढ्न छलफल भएको बताए ।
