लन्डन । बेलायतको सशस्त्र प्रहरीले लन्डनमा बुधबार भएको आतंककारी आक्रमणपछि ८ जना पक्राउ गरेको छ । बर्मिङहम, लन्डनसहित यूकेका ६ विभिन्न ठेगानामा छापा मारी प्रहरीले त्यसै रात ८ जना पक्राउ गरेको हो । प्रति आतंकवादका एक जना वरिष्ठ अधिकारी मेट्रोपोलिटन पुलिस असिस्टेन्ट कमिश्नर मार्क राउलीले पक्राउबारे जानकारी दिंदै लन्डन घट्ना अन्तराष्ट्रिय आतंकवादबाट प्रेरित भएको जनाएका छन् ।
राउलीले मृतक संख्या परिमार्जन गर्दै घट्नामा आक्रमणकारीसहित चार जनाको मृत्यु भएको र २९ जनाको उपचारमा भइरहेको जनाए । घाइतेमध्ये ७ जनाको अवस्था गम्भीर छ ।
बेलायती रक्षामन्त्री माइकल फालनले वेष्टमिनिस्टर हमला इस्लामिक आतंकवादसंग सम्वन्धित भएको विश्वास व्यक्त गरेका छन् ।
बेलायती संसद भवन अगाडि पर्यटकहरुले खचाखच भरिने वेष्टमिनिस्टर पुलको पेटीमा हिंडिरहेका पैदल यात्रुमाथि अन्धाधुन्ध कार कुंदाएर एक संदिग्ध आतंककारीले कार रेलिङमा ठोक्काएको थियो । पछि उक्त आक्रमणकारीले संसद भवनको सुरक्षा दिइरहेका प्रहरीलाई धारिलो चक्कु प्रहार गरेको समाचारमा जनाइएको छ । सशस्त्र प्रहरीले आक्रमणकारीलाई गोली हानी मारिदिएका छन् । प्रहरीले उक्त घट्नामा प्रयोग भएको कार बर्मिङहमबाट भाडामा लिइएको जनाउंदै आक्रमणकारी बेलायतमै जन्मिएको भएपनि उसको परिचय खुलाएको छैन् ।
बेलायती प्रधानमन्त्री टेरेजा मेले संसदलाई सम्वोधन गर्दै घटनाबाट आफूहरु नडराएको जनाइन् । उनले सशस्त्र प्रहरी संख्या बढाइएको पनि बताइन् । अघिल्लो दिन उनले भावुक मुद्रामा घट्नाको भत्र्सना सहित लन्डनको आतंककारी घट्नाबाट बेलायती मुल्य मान्यता परास्त हुन नसक्ने बताउंदै घट्नालाई तुच्छ र घृणित बताएकी थिइन् ।
यस घट्नामा नेपाली कोही नपरेको लन्डनस्थित नेपाली दूतावासले जनाएको छ ।
