नेपाली सिनेमाको वृत्तचित्र बेलायतमा देखाइंदै

लन्डन । करिब दुई दशकदेखि चलचित्र पत्रकारिता 
गर्दै आएका पत्रकार राजन घिमिरे नेपाली चलचित्र सम्वन्धि आफ्नो वृत्तचित्र लिएर लन्डन आएका छन् ।
अंग्रेजी भाषामा पनि सब टाइटल राखिएको ‘यात्रा नेपाली सिनेमाको’ वृत्तचित्र लिएर उनी लन्डन आएका हुन् ।

घिमिरेको उक्त वृत्तचित्र आगामी शनिबार १८ मार्च दिउसो एक बजे गोल्डेनसीप रेष्टुरेन्ट साउथ हयारो लन्डन र सांझ ७ बजे गोर्खा क्लव प्लमस्टिडमा देखाइने भएको छ । अन्य शहरमा समेत प्रदर्शनीको तयारी छ ।

वृत्तचित्रमा नेपाली चलचित्रको सिंगो इतिहास छ । ४५ मिनेट लामो उक्त वृत्तचित्रमा नेपाली चलचित्र निर्माण कसरी र कहिले शुरु भयो ? आजसम्मको अवस्थामा आउन नेपाली चलचित्र क्षेत्रले भोग्नु परेका समस्या के के छन् ? नेपाली सिनेमाको हालसम्मको बजार अवस्था कस्तो रहयो ? लगायत नेपाली चलचित्रको इतिहाससंग जोडिएका सर्जकहरूको अनुभव र विचारलाई पनि वृत्तचित्रमा समेटिएको घिमिरेले बताए ।

वृत्तचित्र निर्माणका लागि गोमा विष्ट र नारायण विष्टले घिमिरेलाई साथ दिएका छन् । हाल क्ल्याप बोर्ड र एन.आर.एन टिभी शो नामक टेलिभिजन शो सञ्चालन गरिरहेका घिमिरेले भने, ‘वृत्तचित्रले नेपाली चलचित्रको इतिहास बोल्ने छ भने नेपाली चलचित्रबारे रुची राख्ने तथा अध्ययन गर्न चाहनेका लागि बलियो दस्तावेज बन्ने छ ।’