मन संग मन सांट्दै अनिस

लन्डन । प्रवासमा संगीत साधना त्यति सहज छैन् । यो वाध्यताबीच काम र व्यवसायबाट फूर्सद निकालेर संगीत सृजना गर्ने चुनौती सामना गरेका छन् नवगायक अनिस पाण्डेले । बिहीबार सांझ उनको गीतमा बनेको पहिलो म्यूजिक भिडियो लन्डनबाट सार्वजनिक गरिएको छ । ५ दशक बढि समय नेपाली संगीतमा बिताएकी वरिष्ठ गायिका मिरा राणा र नेपाल पत्रकार महासंघ, बेलायतका अध्यक्ष नरेश खपांगीमगरले ‘मन संग मन…’बोलको गीतमा बनेको म्यूजिक भिडियो सार्वजनिक गरेका 
हुन् ।

सम्वोधनका क्रममा गायिका राणाले अनिसमा गायनको धेरै सम्भावना रहेको बताउंदै शुभकामना दिइन् । पत्रकार महासंघ बेलायत अध्यक्ष खपांगीमगरले शुभकामना व्यक्त गर्दै नवगायक पाण्डेलाई मिडियाबाट पूर्ण समर्थन रहने आश्वासन दिए ।

समन अधिकारी निर्देशित उक्त म्यूजिक भिडियोमा नायिका केकी अधिकारी र नरेनले अभिनय गरेका छन् भने दीपेन्द्र थपलिया र कुशल श्रेष्ठको छायांकन छ । गीत अर्जुन पोखरेलले रचेका हुन् भने एरेन्जर बाबु प्रधान र कन्सेप्ट डिरेक्टर हरि ढकाल छन् ।

सञ्चारकर्मी तथा भिडियो निर्देशक कुशल श्रेष्ठले संयोजन गरेको उक्त कार्यक्रम कलाकार मनिष श्रेष्ठले सञ्चालन गरेका थिए । कार्यक्रममा सहभागी करिब डेढ दर्जन संगीत श्रष्टा तथा सञ्चारकर्मीहरुले गायक पाण्डेलाई शुभकामना दिंदै उनको गायनमा परिपक्वता रहेको प्रतिक्रिया दिए । कतिपयले पाण्डेको स्वरलाई उदित नारायण झासंग पनि दांजे ।

हेर्नुहोस भिडियोः