सोमबार, कार्तिक १० २०७७ | Mon, October 26, 2020
नेपालको समय: १९:०० | UK Time: 13:15

सेब्रुको तालसँगै रेडिङमा मनाइयो ग्याल्पो ल्होसार

वीनेपाली
२०७३ फागुन २३ गते २१:४२

लन्डन । बेलायत बस्ने शेर्पाहरुले आफ्नो महान चाड ग्याल्पो ल्होसार जातीय संस्कार र संस्कृतिका साथ मनाएका छन् ।
रेडिङको बर्गफिल्ड कम्युनिटी स्पोर्टस् एसोसिएसन हलमा शनिबार आयोजित २१४४ औँ ल्होसार कार्यक्रममा उनीहरु शेर्पा भाषाको गीत गाए, सेब्रु नाचे र शेर्पाहरुको विशेष परिकार खाप्से, छ्याङ खाए । सिंगारपटारले गुम्बाझैँ लाग्ने सो हलमा छिर्ने बित्तिकै शेर्पा महिलाहरुले शेर्पा विधिअनुसारले स्वागत गरेका थिए ।

शेर्पा एसोसिएसन यूकेले आयोजना गरेको सो कार्यक्रमको प्रमुख अतिथि बेलायतका लागि नेपाली राजदूत डा. दुर्गाबहादुर सुवेदी थिए । यसवर्ष ग्राजुएसन गरेका शेर्पा युवायुवतीलाई कदर पत्र, आजीवन सदस्यहरुलाई प्रमाण पत्र, गोरखा सैन्यमा बढुवा भई उच्चपद प्राप्त शेर्पाहरुलाई सम्मान पत्र वितरण गरेपछि कार्यक्रमलाई सम्बोधन गर्दै राजदूत डा. सुवेदीले ल्होसार पर्व शेर्पाहरुको मात्र नभई सबै नेपालीहरुको पर्व भएको बताए । उनले नेपाल प्रकृति, संस्कृति, र एडभेन्चरको त्रिवेणी भएको उल्लेख गर्दै सगरमाथा, गोरखा र लुम्बिनी नै नेपालको परिचय भएको प्रष्ट पारे । उनले नेपालीहरु बहादुर मात्र होइनन्, इमानदार र मिलनसार छन् भन्ने प्रमाणित गर्नुपर्ने पनि बताए ।

शेर्पा संघ यूकेका अध्यक्ष साना शेर्पाले शेर्पाहरुको संस्कृति र परम्पराको संरक्षणका लागि वेलफेयर सेण्टर स्थापना गर्ने योजना रहेको जानकारी दिए । कार्यक्रममा नेपाल आदिवासी जनजाति महासंघ बेलायतका अध्यक्ष तुल छन्त्याल, महासचिव कर्मा पहाडी शेर्पा, तमुधिं यूकेका अध्यक्ष ज्ञाम गुरुङ, तामाङ सोसाइटी यूके अध्यक्ष अञ्जु योञ्जन, विश्व नेपाली साहित्य महासंघका अध्यक्ष विश्वासदीप तिगेला, नेपाल पत्रकार महासंघ यूकेका अध्यक्ष नरेश खपांगीमगर, मगर संघ यूकेका अध्यक्ष नेम थापामगर, पुन समाज यूकेका अध्यक्ष एकबहादुर पुन, तामाङ घेदुङ यूकेका अध्यक्ष प्रेम लामा, पासा पुच रेडिङका अध्यक्ष रमेश श्रेष्ठ, तमु समाज यूकेका अध्यक्ष अर्जुन गुरुङ, सुनुवार सेवा समाज यूकेका अध्यक्ष यादव सुनुवार, नेपाल आदिवासी जनजाति महिला महासंघ यूकेकी सचिव सरला रानामगर लगायतको उपस्थिति थियो ।

महासचिव ङवाङ योन्तेन ग्याछो शेर्पाले सञ्चालन गरेको उक्त कार्यक्रममा टासी लामाले स्वागत मन्तब्य दिएका थिए भने कलाकारहरुले शेर्पा नृत्य साथै नेपाली गीत र नृत्यहरु प्रस्तुत गरेर मनोरन्जन दिलाए ।

प्रतिक्रिया

सम्बन्धित सामाग्री

फेसबुक