सफारी हलमा ‘लुट २’ ले लुट्यो दर्शक मन

लन्डन । कलाकारद्वय दयाहाङ राई र सौगात मल्ल नेपाल उड्नु अघिल्लो दिन आइतबार सफारी सिनेमा हल, हयारो लन्डनमा दर्शकमाझ झुल्किए । आफ्नो फिल्म हेर्न दर्शक ओइरिएको देखेर ति कलाकार दंग देखिन्थे । ‘बेलायत बसाइ सांच्चिकै अविष्मरणीय रह्यो’, पहिलो पटक बेलायत आएका नायक सौगात मल्लले वीनेपालीसंग भने, ‘घुमघामसहित दर्शकहरुसंगै बसेर फिल्म हेर्न पाउंदा ज्यादै 
रमाइलो लाग्यो ।’ सौगातको यसपटकको भ्रमण ‘लुट २’ को प्रवर्धन नै बित्यो । ‘नेपाली चलचित्र मन पराउने दर्शकहरु बेलायतमा धेरै हुनु हुंदो रहेछ’, सौगातले थपे, ‘यसले नेपाली चलचित्रको बजार अन्तर्राष्ट्रिय स्तरमा विस्तार भइरहेको संकेत मिल्छ ।’

नायक दयाहाङ राईले पनि बेलायत बसाइ उपलव्धिमुलक रहेको बताए । उनले नेपाली चलचित्र मन पराइदिने दर्शक र आफ्नो फिल्म प्रदर्शन गर्ने गोर्खा वरियरप्रति आभार समेत व्यक्त गरे ।

सफारी सिनेमा हलको शो हेर्न झण्डै चारसय दर्शक उपस्थित थिए । कलाकारहरुसंग तस्विर खिचाउन दर्शकहरु तंछाड मंछाड गरिरहेका देखिन्थ्यो । पहिलो पटक अल्डरसट प्रिन्सेस हलमा भएको रेड कार्पेट शो पनि हाउस फुल थियो ।
तस्विरः बीरेन्द्र श्रेष्ठ