लन्डन । नेपालीले इतिहासमै पहिलो पटक लन्डनस्थित रोयल अल्बर्ट हलमा गरेको कन्सर्टबाट संकलित ४० लाख रुपैयां नेपालमा भूकम्पले क्षतिग्रस्त विद्यालय पुनर्निर्माणमा खर्च गरिने भएको छ । हेल्प नेपाल नेटवर्कले कन्सर्टबाट उठेको झण्डै ४० लाख रुपैयां गोरखास्थित श्री भिमोदय प्राइमरी स्कुल, घ्याल्चोक ९ मा ६ कोठासहित भवन पुनर्निर्माणमा खर्चन एक सम्झौतामा हस्ताक्षर गरेको छ ।
हेल्प नेपाल नेटवर्क यूकेका कोषाध्यक्ष सचिन श्रेष्ठका अनुसार, गत फेब्रुअरी १६ मा उक्त विद्यालयसंग चार किस्तामा रकम उपलव्ध गराउने सम्झौता भएको छ । भूकम्पले भवन ध्वस्त बनाएर अझै पनि विद्यार्थी पालमुनी पढ्न वाध्य छन् ।
हेल्प नेपाल नेटवर्क यूकेको संयोजनमा लन्डन साउथ केन्जिङटनस्थित उक्त हलमा कन्सर्ट गरिएको थियो । जुन २८, २०१५ मा गरिएको कन्सर्टमा नेपाली संगीत क्षेत्रका हस्तीहरु दीप श्रेष्ठ, ओमविक्रम विष्ट, योगेश्वर अमात्य, दिपक थापामगर, जेम्स् प्रधान, सुजिल कर्माचार्य, तृष्णा गुरुङ लगायत वाद्यवादकहरु सम्मिलित १७ जनाको समूह लन्डन आएको थियो ।
