फोरमको गत वर्षको कार्यक्रमका सहभागी
लन्डन । एनआरएनए यूके महिला फोरमले १०७ औं अन्तर्राष्ट्रिय नारी दिवस मनाउने तयारी गरेको छ । आगामी ४ मार्च शनिबार भेटघाट रेष्टुरेन्ट, अल्डरसटमा कार्यक्रम हुन लागेको हो ।
दिउसो २ देखि सांझ ६ बजेसम्म हुने उक्त कार्यक्रम महिला अधिकार माग्दै भाषणमा मात्र सिमित हुने छैन् । फोरमले विगत जस्तै यसपटक सुदुरपश्चिमको डोटी जिल्लाका आंग खस्ने रोगबाट पीडित महिलाहरूको उपचार सहयोगार्थ च्यारिटीसहित दिवस मनाउन लागेको छ ।
कार्यक्रममा सहभागी भइदिन एनआरएनए यूके महिला फोरमकी संयोजक सुशिला राईले सबैमा अपिल गरेकी छन् । एनआरएनए यूके आइसीसी सदस्य सुष्मा राईले पनि उक्त पवित्र कार्यमा साथ दिन सबैलाई अनुरोध गरेकी छन् ।
गत वर्षको नारी दिवसमा फोरमले चेतना समूह नेपाल, घक्र्यौली २ हरिवन सर्लाहीद्वारा सञ्चालित द्वन्द्वपीडित अनाथ वालगृहको सहयोगार्थ च्यारिटी गरेको थियो । कार्यक्रमबाट ५ हजार पाउण्ड (करिब ८ लाख रुपैयां) संकलन गरि हस्तान्तरण गरिएको थियो ।
यसैबीच, एसियन महिला असोसिएसन यूके (आमा) ले पनि नारी दिवस मनाउने भएको छ । भेटघाट रेष्टुरेन्टमै ५ मार्च आइतबार कार्यक्रम गर्न लागिएको अध्यक्ष अम्बिका खड्काले जनाइन् । आमाले विगत दुई वर्ष देखि नारी दिवस मनाउंदै आएको छ ।
