लन्डन । ब्लकबस्टर ‘लुट’ को सिक्वेल ‘लुट २’ यूके प्रिमियरका लागि नायकद्वय दयाहाङ राई र सौगात मल्ल बिहीबार लन्डन आइपुगेका
छन् । लन्डन उत्रिए लगत्तै उनीहरु एयरपोर्टबाट सिधै प्रेस मिटमा सहभागी भए । दयाहाङलाई बेलायत पानी पधेंरो जस्तै छ । तर, पहिलो पटक आएका सौगात मल्ल थकान बाबजुद पनि उत्साहित देखिन्थे । फिल्म प्रवर्धन र घुमघाम एकै साथ हुने भएर यूके भ्रमण अविष्मरणीय हुनेमा ढुक्क छन् सौगात ।
नेपाली चलचित्र उद्योगमा लुटमार्फत पृथकता पस्कन सफल भए निर्देशक निश्चल बस्नेत । उक्त फिल्म प्रदर्शन भएको ४ वर्षपछि यसको सिक्वेल शुक्रबारदेखि नेपालभर प्रदर्शन हुंदैछ । ‘लुट २ ले कस्तो परिणाम ल्याउने हो मुटु ढुकढुक भइरहेको छ’, दयाहाङ पत्रकारमाझ भन्दै थिए, ‘लुट २ भित्र मानिसले भोग्दै आएको समय, मनोदशा र भोगाइ छन् । चार वर्षपछि तिनै पात्र फेरि दर्शकमाझ आएका छन् । सायद हामीलाई दर्शकले मन पराइदिनुहुनेछ ।’
लुटको सफलतासंगै नेपाली सिनेमामा नयां मोड आएको स्मरण गर्दै दयाहाङले त्यसयता व्यवसायिक फिल्म बन्ने क्रम बढेको बताए । ‘विश्व बजारमा नेपाली फिल्म स्थापित हुनुमा नेपाली डायस्पोराको ठूलो योगदान छ’, उनी कृतज्ञ भए, ‘हो हामी हलिउड बलिउडको दांजोमा छैनौं तर आफ्नो कथा सुन्न भव्य ठाउं, आर्थिक र प्राविधिक सम्पन्नता मात्र चाहिन्छ जस्तो लाग्दैन ।’
एकताका महानायक भनिने राजेश हमाल अहिले ओझेल छन् । बरु सौगात र दयाहाङकै डिमान्ड बढि छ यतिखेर । दयाहाङलाई कस्तो लाग्दो हो आफ्नो बढ्दो लोकप्रियता देखेर ? भन्छन्, ‘हामीले नेपाली सिनेमा थामेका छौं तर निर्देशकले भन्न खोजेको कुरा घत लाग्दो छैन् भने फिल्म चल्दै चल्दैन ।’ नाम चलेका कलाकारले विज्ञापन हुने भएपनि फिल्म चाहिं नचल्ने उनको बुझाइ छ । मिडिया सामु त्यति नबोल्ने सौगातले ‘लुट २’ बाट उत्साहित भएको बताए ।
गोर्खा वरियर्सले बेलायतका विभिन्न शहरमा ‘लुट २’ प्रिमियर गर्दैछ । निश्चल बस्नेत निर्देशित उक्त फिल्मको शनिबार २५ फेब्रुअरीमा अल्डरसट प्रिन्सेस हलमा ग्रयाण्ड रेड कार्पेट प्रिमियर हुंदैछ भने २६ मा फोकस्टन, ३ मार्चमा टिडवर्थ र ४ मार्चमा आसफोर्ड केन्टमा प्रदर्शनको तयारी छ । लन्डनस्थित हयारो सिनेमा हलमा ५ मार्च र रेडिङमा ११ मार्चका दिन प्रदर्शन गरिने आयोजकले जनाएका छन् ।
‘लुट २’ को आइटम गीत ‘लाइदिउंला चोखो पियार, लैजाउ घुमाउन मलाई ठमेल बजार’ अहिले खुबै हिट छ । फिल्ममा सौगात मल्ल, दयाहाङ राई, कर्म शाक्य, रिचा शर्मा, बिपीन कार्की, प्रवीन खतिवडा, सुशीलराज पाण्डे, प्रतीकराज न्यौपाने लगायतको मुख्य भूमिका छ ।
तस्विरः बीरेन्द्र श्रेष्ठ
