एनआरएनए यूकेको अधिवेशन सेप्टेम्बर ९ मा

लन्डन । एनआरएनए यूकेको ७ औं अधिवेशन आगामी सेप्टेम्बर ९ मा हुने भएको छ । संघको शनिबार प्लमस्टिडस्थित 
चौतारी रेष्टुरेन्टमा सम्पन्न कार्यसमिति बैठकले अधिवेशन अल्डरसटस्थित एम्पायर हलमा गर्ने निर्णय गरेको हो । आगामी १२ मार्चमा हुने साइबर बैठकले निर्वाचन समिति र विधान संशोधन समिति गठन गर्ने निर्णय भएको संघका प्रवक्ता खुशी लिम्बुले जानकारी दिए ।

संघका अध्यक्ष मुछेत्र गुरुङको अध्यक्षतामा भएको उक्त ९ औं कार्यसमिति बैठकमा एनआरएनए युरोप संयोजक कुल आचार्य, आइसीसी सदस्यहरु योगेन क्षेत्री, सुष्मा राई, विश्वासदीप तिगेला, संगिता मरहट्ठा र केही सल्लाहकार समेत सहभागी थिए ।

बैठकले एनआरएनए यूकेको महत्वाकांक्षी नेपाल हाउस प्रोजेक्टलाई च्यारिटीबाट बिजनेस मोडलमा लैजाने निर्णय गरेको छ । अब स्वामित्व संघले लिएपनि नेपाल हाउसमा व्यक्तिगत वा सामूहिक लगानी गर्न बाटो खुल्नेछ । च्यारिटीमा जांदा झण्डै अढाइ मिलियन पाउण्ड खर्च लाग्ने ठानिएको नेपाल हाउस प्रोजेक्टका लागि अर्थ संकलन ज्यादै जटिल भइरहेको छ ।

बैठकले एनसीसी एक प्रोजेक्ट (सिरिसे स्कुल) का लागि सहयोग गर्ने वचन दिएका सबै समाजसेवीमा प्रतिवद्धता रकम छिटो संघको खातामा दाखिला गर्न अनुरोध समेत गरेको छ ।

बैठकले संघका तर्फबाट एनआरएनए आइसीसीले गोरखामा निर्माण गरिरहेको लाप्राक नमुना वस्तीमा स्वयंसेवक खटाउने निर्णय गर्दै अप्रिल ८ सम्म साइटमा पुगिसक्ने निर्णय गरेको छ । आइसीसीले अपेक्षा गरे बमोजिम यूके एनसीसीले लाप्राक गाउंमा इन्टरनेट उपलब्ध गराउन दुई देखि ४ लाख रुपैयांसम्म सहयोग गर्ने निर्णय पनि गरेको छ ।

बैठकले आगामी ४ मार्चमा हुन लागेको १०७ औं अन्तर्राष्ट्रिय नारी दिवस सफल बनाउन महिला संयोजक सुशिला राई र उनको टिमलाई सघाउने निर्णय गरेको छ । बैठकमा आइटी अपरेटर मिलन गुरुङ र प्रेस विभाग संयोजक खुशी लिम्बुले आइसीसीको पहलमा भएको केन्द्रिय सूचना व्यवस्थापन प्रणालीको प्रगति विवरण पेश गरेका थिए ।

प्रतिक्रिया

सम्बन्धित सामाग्री