अर्बपति विनोद चौधरी लन्डनमा सुनाउंदैछन् सफलताको कथा


लन्डन । गैर आवासीय नेपाली संघ बेलायत (एनआरएनए यूके) ले नेपालका एक्ला डलर अर्बपति विनोद चौधरीसंग लन्डनमा अन्तरक्रिया गर्ने भएको छ । आगामी १९ फेब्रुअरी सांझ आइतबार इष्टकोटस्थित ‘भेन्यू फाइभ रेष्टुरेन्ट’ मा कार्यक्रम हुन लागेको हो । उक्त कार्यक्रममा व्यवसायिक अन्तरक्रिया सहित चौधरीको नेपालमा सर्वाधिक विक्री भएको आत्मकथा ‘मेकिङ इट बिगः दि इन्सपायरिङ स्टोरी अफ नेपाल्स् फष्ट बिलिनियर इन हिज वन वर्डस’ को समेत हस्ताक्षर र समिक्षा हुनेछ । पुस्तकमा नेपाल र विश्वमै प्रख्यात वाइवाइ चाउचाउ उत्पादक चौधरी ग्रुपका अध्यक्ष चौधरीको सफलताको कथा र संघर्ष छ ।

चौधरी ग्रुपको बैंकिङ, फाइनान्स, इन्सुरेन्स, हाउजिङ, होटल, रियल स्टेट, इलेक्ट्रोनिक्स, सिमेन्ट, बियर आदिमा लगानी छ । उक्त समूहको इण्डियाको ताज ग्रुपसंग समेत सहकार्य छ । फोर्बस म्यागेजिनले सन् २०१३ मा चौधरीलाई नेपालको एकमात्र डलर अर्बपतिका रुपमा चित्रित गरेको थियो । वाइवाइ चाउचाउ नेपालबाहेक भारतमा मात्र एक अर्ब गोटा विक्री भइसकेको छ । सिजी फुड्सले भारतको राजस्थान राज्यमा फुड पार्क निर्माण र सर्बिया, साउदी अरब र बंगलादेशमा समेत चाउचाउ फ्याक्ट्री विस्तारका लागि काम अगाडि बढाइरहेको छ भने श्रीलंका, रुवान्डा र चितवन राष्ट्रिय निकुन्जभित्र भारतीय ताज होटलको साझेदारीमा न्यू ताज सफारी लजमा लगानी गरेको छ ।

चौधरी ग्रुपले सामाजिक उत्तरदायित्व पनि निर्वाह गर्दै आएको छ । महाविनाशकारी भूकम्प लगत्तै उक्त समूहले ‘दि चौधरी फाउण्डेशन’ मार्फत भत्किएका स्कुल र घर निर्माणमा २५ लाख डलर खर्च गर्ने प्रतिवद्धता व्यक्त गरेको थियो ।

‘सफल उद्योगी चौधरीसंगको अन्तरसंवादले बेलायतस्थित नेपाली व्यवसायी, प्राज्ञ, विद्यार्थी र सिंगो डायस्पोरा लाभान्वित हुने आशा गरेका छौं’, कार्यक्रम संयोजक कृष्ण भट्टले भने, 
’चौधरीका सफलताको कथा र अनुभव हामी सबैलाई प्रेरणादायी हुनेछ ।’

एनआरएनए यूके अध्यक्ष मुछेत्र गुरुङले अर्बपति चौधरीले संघको निम्तो स्वीकार गरेकामा प्रसन्न हुंदै कार्यक्रमले युवा तथा 
नयां र स्थापित व्यवसायीहरुलाई समेत प्रेरित गर्ने आशा व्यक्त गरे ।

आयोजकले निमन्त्रणा गरिएका व्यक्तिलाई मात्र प्रवेश दिइने र इच्छुकलाई सोमबारसम्म एनआरएनए यूकेमा नाम दर्ता गर्न आग्रह गरेका छन् । उक्त कार्यक्रम सभ्य र भव्य बनाउन कृष्ण भट्टको संयोजकत्वमा एक समिति नै बनाइएको छ ।

चौधरीले अक्सफोर्ड युनिभर्सिटी र प्राइस वाटरहाउस कुपर्सको लन्डन कार्यालयमा समेत प्रवचन दिने कार्यक्रम छ ।

प्रतिक्रिया

सम्बन्धित सामाग्री