दृष्टिविहीन विश्वकप क्रिकेटमा नेपाल र इङ्ग्ल्यान्ड भिड्ने

काठमाडौँ, २४ माघ । भारतमा जारी दृष्टिविहीन विश्वकप टि–ट्वन्टी क्रिकेट प्रतियोतिगताअन्तर्गत नेपालले आफ्नो सातौँ खेलमा मङ्गलबार इङ्ग्ल्यान्डको सामना गर्ने भएको छ ।

भारतको बेङ्लोरमा हुने खेलमा नेपालले विजय लक्ष्यका साथ इङ्ग्ल्यान्डसँग प्रतिस्पर्धा गर्नेछ । नेपालले यसअघि खेलेको छ खेलमा एक खेलमा मात्र जित हासिल गरेको छ ।

नेपाल दक्षिण अफ्रिकासँग छ विकेट, बङ्गलादेशसँग ५९ रन र अस्ट्रेलियासँग १० विकेटले पराजित भयो । त्यसैगरी वेष्ट इन्डिजसँग ४३ रन, पाकिस्तानसँग १० विकेट तथा श्रीलङ्कासँग १३१ रनको भारी अन्तरले नेपाल पराजित भएको थियो । प्रतियोगितामा १० टोलीको सहभागिता छ ।

ब्याडमिन्टन 

तीनचुली युथ क्लबका दीपु मगर र विशाल लिम्बूको जोडीले साताँैं बबिन स्मृति ब्याडमिन्टन प्रतियोगितामा आज जित हात पारेको छ ।

किङ कम स्पोर्ट्स क्लबको आयोजनामा पुरानो बानेश्वरस्थित भीमसेनगोलामा भएको खेलमा मगर र लिम्बूको जोडीले चन्द्रसूर्य युथ क्लबका सुवास उलब र अरुण बलामीको जोडीलाई १२–२१, २३–२१ र २१–८ को सेटमा पराजित गरेको हो ।

अर्को खेलमा मानभवनका गजेन्द्र राई र सुजन राईको जोडीले पञ्चकुमारी युथ क्लबका वीरेन्द्र कुँवर र प्रणय घिमिरेको जोडीलाई २१–१४ र २१–१९ को सोझो सेटमा पराजित गरयो । जितसँंगै विजेता दुवै जोडी प्रिक्वाटरफाइनलमा प्रवेश गरेका छन् ।